Shamere Mc Kenzie lo duna training e dianan aki riba traficacion di hende

Counter Trafficking Taskforce Aruba cu cooperacion di Amsterdam Manor Beach Resort, De Palm Tours, La Quinta Beach Resort, Cuerpo Policial, CEDE Aruba y Aruba Marriot Resort, lo organiza for di awe te cu dia 18 di october benidero, training di concentizacion unda e focus lo ta riba traficacion di hende (mensenhandel).

Enfasis den e training lo ta con pa reconoce e siñalnan di traficacion di persona y kico por haci en caso.

 

Trainer lo ta e conocido Shamere Mc Kenzie, kende tabata un victima di traficacion di hende su mes, y na fin di 2016 a duna e prome training na Aruba.

E aña aki e lo bay enfoca mas especifico riba training pa law enforcement (KPA) y personal di hotels y touring operators.

Den e training Shamere Mc Kenzie lo conta su mes un storia di traficacion di hende p’asina purba di preveni casonan di traficacion den futuro.

 

Despues Shamere Mc Kenzie lo duna un training special pa personal di Cruz Cora Aruba riba e peliger pa traficacion di hende (mucha) ora di un disaster manera e horcanan den Caribe. Dia 18 di october 2017, e Dia Nacional contra Traficacion di Hende, Shamere lo sera e siman cu un presentacion na Cas di Cultura pa 500 examenkandidaten di Colegio Arubano, enfocando especial riba e peligronan cu un studiante por confronta ora nan sigi nan studio na Europa of USA.

 

Shamere Mc Kenzie actualmente ta traha na Salvation Army of Central Maryland (USA) como Anti-Trafficking Program Director y ta conoci pa su discursonan y training riba e tereno di traficacion di hende.

Leave a Reply

Top