Sharlon Odean a regresá cas liber di acusacion di ladronisia di auto

WILLEMSTAD – Casonan di ladronisia di auto último tempo na Còrsou ta prácticamente na órden del dia, pero den realidad ta sumamente difícil pa bin cu pruebanan contundente padilanti cu por resultá den condena.

Esaki tabata claramente e caso cu e ciudadano Sharlon Odean di 20 aña di edad dialuna último. En principio Fiscal di Ministerio Público mr. Bas van Vliet a presentá 2 acusacion contra di e hóben mecánico aki.

 

Ladronisia di un auto Mitsubishi Lancer blau cu e plachi di number L 22-34 cu ta pertenecé na un ciudadano di fam Sambo y otro ladronisia di un auto Toyota còrá cu e plachi di number D 54-55 cu ta pèrtenecé na un otro ciudadano, pero di fam Janzen.

Ta trata aki di ladronisia di auto caminda mecániconan hóben, pero vèrsá den e ramo di plumamento, ta kita piezanan for di un autonan hòrtá y pasa over pa otro auto, estilo conopá, kinipí, lapi aki lapi aya!

 

Pa loke t’e caso di e auto Toyota, hopi liher Ministerio Público a laga e caso aki bay numa y no a sigui insistí riba culpabilidad di Sharlon Odean.

E acusado tabatin dos abogado pa su defensa, esta señora mr. R.S.M  Moenir Alam pa loke ta trata ladronisia di e auto Mitsubishi Lancer y señora mr. Gomes pa loke ta trata e Toyota Starlet còrá.

Wes a konstatá ku fiskal den e kaso di e Toyota a presentá un dagfar hopi fofo i ta komo si fuera durante tratamentu di e kaso fiskal a bini ku un otro akusashon padilanti i kier a trata pa adaptá su ponensianan.

 

Huez sinembargo a mustra comosifuera ta trata di completamente un otro acusasion. E conclucion final ta cu pa loke ta trata e caso di e Toyota, Huez a laga Sharlon Odean bay liber di e acusacion di ladronisia.

E autonan hòrtá tabata riba un tereno grandi, den e bario Montaña, caminda e mecániconan aki (plumadónan di auto) ta kònkel cu e piezanan pa fit den otro auto.

Tabata dia 11 di april cu a detené Sharlon Odean, pero esaki a bisa cu e auto hòrtá cu nan a bin hañ’é ta tover na dje, esta e Mitsubishi Lancer tin entre 4 pa 5 luna riba e tereno aki, pero Huez mr. Paulides a bisa cu esaki absolutamente no por ta bèrdad, pasobra ta dia 28 di febrüari e doño a pèrd’é. Sharlon Odean a cay será pa 10 dia.

 

Abogado señora mr Moenir Alam a bin cu ponencianan pa lanta duda serio den e procèsverbalnan cu Polis a traha.

Huez finalmente a concluí cu pa loke ta trata e Mitsubishi Lancer e procèsverbalnan no ta di un calidad aceptabel, como tal p’e razon aki tambe a laga Sharlon Odean bay y pasobra e ta un firstoffender. Finalmente ámbos doñonan di auto a keda perhudicá, ya cu Huez a constatá insuficiente prueba.

 

Top