Shoco Beer Co. a haci un donacion di $10,000 na Parke Nacional Arikok

Diahuebs, 29 di juni ultimo, Shoco Beer Co. a marca su donacion di US $10,000 na Parke Nacional Arikok, durante un presentacion di check cu a tuma lugar n’e Centro di Bishitante.
E cerbes ta nombra pa nos shoco local, un especia endemico den peliger di extincion, y un di Aruba su simbolonan nacional.
Un parti importante di e cultura di craft beer t’e consenshi social di e breweries chikito aki cu ta wordo elogia pa nan trabou caritativo y contribucionnan na nan comunidadnan local.

E Shoco Beer Company ta orguyoso di por honra e tradicion aki na Aruba, y e donacion lo bay na yuda un proyecto di re-ubicacion di shoco (transportando e shoconan for di areanan peligroso manera sitionan di construccion pa Parke Nacional Arikok). Adicionalmente, un porcentahe di benta lo ta dedica na un fondo cu lo bay pa yuda mas proyecto di conservacion den e parke.
Craft beer a drenta e mercado Arubiano pa prome biaha na 2014, y desde e tempo ey el a sigui crece den popularidad.
Awor, Aruba tin su prome propio craft beer. Na nei di e aña aki, e Shoco Beer Company a lansa su prome dos cerbesnan, como parti di un serie di seis cerbes.

“Nos tabata kier un serie di craft beer cu ta representa nos estilo di bida di isla. Nos tabata kier pa e ta autentico y reconoci p’e Brewers Association como craft beer, y p’e motibo nos a reuni cu algun craft brewers na Merca p’asina busca un cu a compronde nos vision y por a captura e sabor y notanan cu nos tabata kier.
Despues di varios tramite nos a descubri un brewmaster na Kentucky, y hunto nos a formula 6 diferente craft beer cu finalmente lo forma parti di e Shoco Beer Co.,” segun informacion di e gerente senior di benta, Taylor Escobedo.

E prome dos seleccionnan di Shoco Beer, esta Blood Orange Blondes y Long Legged Lager, a debuta durante e Craft Beer Festival cu a tuma lugar na mei ultimo na Renaissance Convention Center, y di biaha nan tabata un hit instantaneo.
Den transcurso di e siguiente lunanan, amantenan di cerbes por spera un Pineapple Wheat Wave, TanLine Tangerine IPA, Sun of a Beach Prickly Pear Wheat, y One Hoppy Island Toasted Coconut Pale Ale.

Leave a Reply

Top