Si AVP kier sigui den Gobierno, Ministernan mester aumenta den voto y resto di candidatonan no por saca menos di 400 voto

E tendencia di e ultimo dos eleccionnanm di 2009 y 2013, ta cu mas o menos 10 mil persona ta keda sin bay vota. Esaki ta nifica cu e aña aki probablemente e no ta diferente.

Ya caba Censo a anuncia cu tin 70.749 persona registra cu derecho di voto y por asumi cu cu un 60 mil persona lo bay deposita nan voto.

Esaki ta nifica cu e kiesdeler lo ta rond di 2.850 voto.

 

Manera cu a wordo anuncia anteriormente, den e eleccion aki tin un total di 33.943 hende homber y 36.808 hende muher cu lo bay deposita nan voto.

Di e grupo aki di votador, 50.238 ta personanan naci na Aruba y e resto ta personanan cu a nacionalisa.

Di e grupo aki rond di 4800 ta votadornan nobo, sea cu nan a cumpli 18 aña of personanan cu a haya nacionalidad Hulandes desde e ultimo eleccion.

 

E eleccion aki sigur ta bay ta un reto grandi pa partido AVP. No solamente nan ta enfrenta e peso di dos Gobernacion tras di lomba, trahando duro pa bay logra un di tres Gobernacion sigui, pero tambe cu perdida di varios candidato, y di peso manera: Otmar Oduber (4008 voto); Marisol Lopez Tromp (1642 voto); Michelle Hooyboer (1185); Juan David (1314); Paul Croes (1898); Alan Howell (422).

En total aki ta papia di 10.469 voto di e total di 33.103 voto cu AVP tabatin den eleccion di 2013.

Si asumi cu mantene e base ey, e ta nifica cu nan lo tin 8 asiento sigura. Di otro banda, e hecho cu e candidatonan a sea bandona partido of a retira no ta nifica cu automaticamente e votonan aki partido AVP lo perde nan.

 

Un 50% sigur ta votadornan di AVP y no di e candidatonan, cu por nifica un total di 27.634 voto cu ta mas o menos 9 asiento.

AVP ta campañando fuerte tanto bou votadornan nobo como serca simpatisantenan di otro partido. Si di e grupo aki AVP haya un 1000 voto extra, nan lo yega 10 asiento.

Si uza otro formula.

Si AVP su meta pa bay un di tres Gobernacion, e candidatonan mester campaña fuerte. Lider di partido Mike Eman sigur ta aspira pa yega casi 10 mil voto, y e otro candidatonan hunto mester yega minimo 33.600 voto.

Esnan cu ta concentra pa haya hopi voto sigur t’e Ministernan.

 

E tres Ministernan Benny Sevinger, Mike de Meza y Arthur Dowers mester campaña pa hunto cu Richard Arends yega 10 mil voto, cual esnan serca di partido ta kere cu no ta problema pa yega pa haci e total net 20 mil voto. E resto t’e problema pa AVP.

Alex Schwengle probablemente no ta bay aumenta den voto y e lo mester cay den e grupo di resto di candidatonan, den cual tin dos cu sigur cu lo ranca hopi voto cu ta Richard Visser, Carlos Bermudez, Gerlien Croes y Clayton Croes.

E dos promenan cu di e area di Noord sigur lo haya den careda di 1000 voto y e grupo aki hunto tin e tarea di saca 3 mil voto.  Esaki ta nifica cu e resto di 19 candidatonan mester traha duro y yega sigur 500 voto of mas si nan kier pa AVP keda den Gobierno cu 12 asiento.

 

E partido tin un trabou duro su dilanti y liderazgo ta depende sigur p’e candidatonan di eleccion pasa no solamente mantene nan votadornan of hasta aumenta esaki, pero cu e candidatonan hoben y nobo demostra e confiansa cu a deposita den nan y debuta cu cifranan sorprendente den voto.

Top