Si awe tardi, doñonan di equiponan pisa no haya un reaccion positive, por spera accion mas pisa y desastroso

Despues cu diabierne atardi, doño hunto cu e chofernan di equipo pisa a dicidi di blokea pa cuminza e rotonde di Watty Vos Blvd, a sigui un reunion na Oficina di DOW, presidi pa Marlon Croes, den presencia di e director di e contratista Mota Engil, cu no a conclui, pero a keda acorda cu p’awe pa 5 or di atardi, lo tin un contesta riba e protesta.

 

Manera nos a ser informa, si e contesta di awe tardi, no ta na nan satisfaccion, e proximo accion lo ta uno manera a yega di sosode na St. Maarten, unda pa 3 dia largo, doñonan di equiponan pisa a ser tur ader di trafico, paralisando tur movilidad n’e isla.

No ta exclui cu esey lo por sosode, si e contratista Mota Engil keda intransigente, cu Aruba lo habri dia di mañan si tin movilidad, pasobra lo sera tur puntonan clave pa trafico.

 

Te ayera, por a tende comentario, cu hopi Arubiano ta sostene e protesta, pasobra no por t’asina cu un compania stranhero ta haya trabao na Aruba, ta wordo paga cu fondo di Aruba, maske cu e ta un proyecto PPP, pero na final, ta pueblo ta paga e cuenta.

Gobierno por hay’e den un situacion cu nan no ta desea, net awor den porta di eleccion. No por t’asina cu yiunan di tera ta keda sin beneficia economicamente, pero si tin pa companianan stranhero.

 

Mota Engil no a ni aserca ningun compania local pa por traha cu nan. E contratista aki hasta trece machin pa traha su propio cement, asfalt, siendo cu nos tin dicho industria na Aruba tambe. Kier men cu nan no kier participa na economia di e pais aki, anto pesey e accion aki a haya sosten di hopi hende, maske cu Gobierno ta papia di drecha economia di e pais aki.

 

E lanta di biaha un voz, mescos lo pasa si CITGO neglisha contratistanan local pa traha den e refineria, cu manera tin informacion caba, lo trece 2 compania di Venezuela pa traha den e refineria.

E modus operandi aki ta pone cu tin mas “huida” di divisas pa exterior, cu keda placa ta circula den comunidad di Aruba. Anto asina sigur pueblo no kier ningun proyecto.

 

Manera a ser bisa na AWEMainta, si no tin entrada pa yiunan di tera, no por tin tampoco p’esnan cu kier bin gana nan placa solamente na Aruba.

Si awe tardi no tin un solucion satisfactorio, e cuenta ta core pa Gobierno, ora cu Aruba for di mañan cu ningun hende por yega nan destinacion final, pasobra tur ader principal lo ser blokea.

 

 

Top