Si reunion di mayan merdia no produci ningun resultado positive No ta exclui cu lo tin accion di protesta na Orchid Casino

Hubert Dirksz, Presidente di FTA, despues di a reuni cu e trahadornan di Orchid Casino (RIU Antiyas), cu ta mustra cu e compania no kier reconoce FTA pa representa e trahadornan, a reuni ayera mainta na Centro di Bario Tanki Leendert.

A keda dicidi cu mayan merdia 2 or un otro reunion a keda convoca pa FTA sinta na mesa cu gerencia di Orchid Casino, cu e speranza cu lo por cuminsa negocia un CAO nobo. Si esaki no t’e caso, por spera accion na dicho casino, ya esey t’e decision tuma ayera den e reunion,

 

Ta mas di dos aña caba cu FTA a gana referendum pa representa e trahadornan di Orchid Casino y FTA a entrega un proposicion pa cuminsa negocia un CAO.

E compania a dicidi di lanta caso contra Mediador di Gobierno pa bringa presencia di FTA y dos aña a pasa y gerencia no a sinta cu FTA pa negocia e CAO.

 

Awor despues di dos aña FTA a bolbe mustra cu e tin derecho pa ser respeta y cu mester sinta na mesa. P’e motibo aki compania a exigi lista di miembro. Pero compania a dicidi di haci maluso di e informacion aki pa pone presion riba e trahadornan.

Apesar di tur esfuerzo compania ta haciendo contrario p’asina e trahadornan no wordo representa.

FTA ta condena e actitud aki di e dunador di trabou cu no ta contribuyendo na trankilidad laboral un biaha mas. Pesey di awor caba FTA kier laga gerencia di Orchid Casino sa, cu nan tin diferente paso pa tuma, e.o. cuminsa na pone trabao abao.

 

Despues di e reunion di mayan merdia 2 or, lo dicidi con siman lo habri na Orchid Casino.

Leave a Reply

Top