Si situacion na InselAir ta caotico, na Aruba Airlines e situacion no ta mihor

Situacion ta tenso bao di e trahadornan di Aruba Airlines, unda practicamente tur siman nan ta retira hendenan clave di e compania. Como cu gerencia a pone tur trahador firma un documento, unda nan no mag di haci ningun declaracion na tercera, sigur no na ningun periodista ta haci’e poco dificil pa haya confirmacion of no di tur e noticianan cu e.o. nos ta haya tende.

E pregunta ta, cu ki meta gerencia di Aruba Airlines, y den e caso aki, un tal Erwin Gonzalez a bin aden pa haci e “durty job”. E t’esun cu ta kita esnan cu e kier kita, sin pasa e proceso na Departamento di Trabao, seccion di Retiro.
Asina p.e. siman pasa, e tal Erwin Gonzalez a kita e COO, Perret Gentil, kende t’e Hefe di e Pilotonan di Aruba Airlines y persona di contacto cu Departamento di Aviacion Civil na Aruba.

For di gerencia, informe ta sali cu Perret Gentil mes a pidi su retiro, pero e modus operandi t’asina cu gerencia ta bisabo di no kier bo servicio mas, y ta obligabo di firma bo retiro, pero extraoficialmente nos por a compronde cu Perret Gentil a bay consulta cu su abogado y lo bringa su retiro.

Y asina e siman aki, algun miembro mas di Aruba Airlines a ser manda cas, sin cu ningun di esnan retira, por habri nan boca.
Extraoficialmente nos a compronde cu e conocido Simeon Garcia kier drenta den Aruba Airlines. Simeon Garcia ta dirigiendo e compania di aviacion di Santo Domingo, PAWA y tambe Aserca na Venezuela y e tin deseo di crea un solo compania pa sirbi Caribe y e kier haya den esaki tambe Aruba Airlines. Ta ser bisa, cu ta Simeon Garcia a manda Erwin Gonzalez pa bay haci e trabao sushi na Aruba.

Nos ta bisa esaki pa autoridad competente e.o. Minister di Trabao, drs. Paul Croes tuma nota di e abusonan aki, y tambe Departamento di Aviacion Civil. Yiunan di tera ta perde trabao, y Simeon Garcia tin un plan grandi pa trece su hendenan pa bin maneha Aruba Airlines, y como tal tur top ehecutivo tin cu bay.

INSELAIR ARUBA
Pa loke t’e empleadonan di InselAir Aruba, te cu ayera ainda nan no por cobra nan salario. E situacion aki tambe ta birando dia pa dia mas caotico. Si sigui asina, tur cos ta indica, manera ta deseo di InselAir Corsou, pa deshaci di InselAir Aruba, lague bati bancarota numa, pasobra InselAir Aruba no por genera placa tog.
Gerencia di InselAir Corsou a laga sa, cu nan tampoco tin placa, esta cu e placa cu nan a haya for di Gobierno di Corsou ta pa nan y no pa Aruba.
Nificando cu e trahadornan na Aruba, lo tin cu pidi un injeccion financiero for di Gobierno di Aruba.

Leave a Reply

Top