Si ta motibo di Facebook a cuminsa un investigacion, anto Ministerio Publico a pone un mancha scur riba su propio actuacion den caso Minister Paul Croes

Ministerio Publico a pifia grandemente, ora cu a ser puntra, kico a conduci na investiga Minister Paul Croes y su empleadonan. E Fiscal Mayor, Erick Olfholt a duna di conoce cu esaki ta debi na tur e publicacionnan cu a aparece riba Facebook.
Esaki ta motibo directo pa bay over na haci entradanan hudicial na 13 lugar, e.o. na cas di Minister Paul Croes, di su empleadonan y otro compania.

Fiscal Mayor Erick Olfholt mes a bisa, cu e no ta bay tras di storianan di indjan, esta cu e no ta bay tras di redo, pero si Facebook a bira e vehiculo pa Ministerio Publico actua, anto esey ta algo sumamentbe peligroso y riba dje cuestionabel.

Na Aruba tin 60 mil hende riba FB a base diario. E cantidad ey ta mas cu mitar di e poblacion di e isla chikito aki. Tur e hendenan aki mester tene cuidou cu loke nan scirbi riba FB, p’e palabranan scirbi no bin persigui nan of cu di repente Polis arma te na djente ta drenta nan cas, pasobra un hende a scirbi cu nan tin droga den cas, por ehempel.

Henter Aruba a tende ora Fiscal Mayor a haci e declaracion aki y tur a keda babuca. Si Ministerio Publico t’asina diligente pa drenta cas di hende, bay cu computer y celular, drenta oficina haci mescos y e motibo directo ta un post riba FB anto tur e 60 mil hendenan ey ta frega.
Awor pregunta di tur hende ta unda Ministerio Publico tabata ora ofensanan for di tur control y bou tur nivel ta tuma lugar riba FB y tambe na cierto radio-emisora. Unda?

Si post di un contrincante politico ta pone bo tuma pasonan drastico asina, kico a para di tur loke a wordo haci na Aruba durante e añanan cu ta tras di lomba.
Hende ta hisa benta pone nan opinion cu palabranan masha mahos y esey mag sin mas. Of e opinion di un ta pisa mas cu di un otro? Ki clase di husticia esaki?

Dama Husiticia tin su wowonan tapa, pero di e extremo aki? Hit and Run y abuso sexual contra mucha di un miembro di oposicion a bay den e afamado doofpot, pasobra aki mescos cu Dama Husticia OM ta sera su wowonan?
Con a para cu e comunidad LGBT cu durante tratamento di e amienda a wordo lastra, humiya y tormenta riba FB y Ministerio Publico a keda keto y awor si no?

Ofensa tabata na ordo di dia pa hendenan cu tabata en busca di nan derecho constitucional y ningun musca a bula ora palabranan fo’i sla tabata wordo scirbi riba FB. Kico t’e diferencia? Nan ta menos hende?
Ta di spera awor cu OM haci su investigacion liher, pasobra aki un hoben politico no por continua cu su trabou, pasobra e ta bou investigacion.

Mes liher cu OM tabata den drenta su cas, mes liher OM mester ta awor pa caba cu e investigacion mas liher posibel. Cua sea e resultado, mester pone un fin t’e incertidumbre aki.

Top