Sidayen van Tijs Senora: Ta pretendé di excluí esnan di ménos recurso, pero,..… esnan cu sembra biento ta cosecha horcan!

No t’asina asina tin tanto violencia y gran cantidad di dropout. Según datonan statistico ta 25% di nos comunidad ta biba un nivel di bida bou di e liña di pobresa.

Nos ta papiando aki di un grupo considerabel cu no por cumpli cu nan necesidadnan básico pa por biba.

Aki mi ta referí na scarsedad òf falta di cuminda, conecion di awa y coriente, bibienda, òf otro necesidadnan básico.

 

Si nos kier accioná pa salba e muchanan salí for di famianan ménos pudiente, si nos kier duna un man pa kibra e circulo di pobresa akí, nos mester frena efectonan di pobresa riba enseñansa.

Cua t’e efectonan di pobresa?

Condicionnan no faborabel pa studia. E condicionnan no faborabel por ta múltiple. Pensa riba e mucha cu no tin coriente na cas, cu no tin còmputer o coneccion di Internèt, pensa riba e mucha cu no tin un mesa na cas, pensa riba e mayor cu t’asina ocupá buscando su pan di cada dia cu no ta motivá su yiu studia, òf e mayor cu no ta den condicion di por yuda su yiu cu su tareanan di cas. Problemanan social emosional.

 

E mucha sali for di casnan ménos prudente ta ocupá su mes cu preocupacionnan cu no ta pertenecé n’e mundo di mucha. E ta puntra su mes p.e. si mèrdia lo tin algo di come òf con lo e haci p’e come.

Ta proba cu hopi biaha e situacion den e casnan aki ta producí hopi strès cu ta hiba na violencia òf abuso den casnan.

 

SITUACION FINANCIERO

Apesar cu nos tin enseñansa liber nos no por excluí cu tin gastonan di transporte, unifòrm, mester di laptop, material cu mester print etc. Mal nutricion.

Ta masha simpel pa splica cu un mucha cu hamber no por concentrá di forma optimal. E mucha cu pa motibonan financiero no ta come balansa, tempran òf lat lo tin problema cu su salud.

 

Problema cu salud, segun e rapòrt di UNICF na 2013 t’e motibo principal pa cual muchanan ta falta skol.

Pues pa nos frena e efectonan di pobresa aki, pa ta concreto nos mester considerá e lo siguiente:

Ban envolucrá mayornan mas den e proceso educacional di nan yiunan.

Mester sostené tur mucha especialmente esnan sali for di casnan pober riba tereno social emosional.

Ban sostené e mayornan di ménos recurso cu financiamento pa gastonan di estudio di nan yiunan.

Ban ofrecé nos muchanan un programa amplio di formacion. Un programa di skol alargá cu ta consistí di formacion social, emosional, spiritual, deportivo y artístico.

 

Nos muchanan ta merecé un nutricion balansa, di manera cu nan por funcioná optimal. Si nos encargá pa un dieta balansa, y suficiente practicá di deporte den e programa escolar, nos por ta sigur cu nos lo mira un bahada den gastonan di salubridad pa motibo cu nos a ofrecé nos muchanan un dieta balansa.

Solamente si nos frena e efectonan aki nos lo logra kibra e circulo di pobresa riba nos pais.

 

 

 

Leave a Reply

Top