Silencio di Gobierno ta ser cuestiona Hulanda kier pa Inspectornan Arubiano funciona di acuerdo cu sistema Hulandes Segun Otmar Oduber

Ex-Minister Otmar Oduber ta lamenta cu un Secretario di Estado, Sharon Dijksma tabata na Aruba, unda el a organisa  un conferencia di prensa, sin tin banda di dje, e.o. Minister Mike de Meza.

Dicho Secretario di Estado a declara cu e.o. lo firma un acuerdo cu Aruba, caminda ambtenaarnan di Hulanda lo bin haya e parti legal pa por mete den maneho di Aviacion Civil na Aruba.

 

Segun Otmar Oduber, esaki ta un situacion hopi raro, pasobra e ta un maneho netamente di Aruba. Ta meramente pe maneho aki Aruba tin categoria 1 y sa di mantene durante tur e añanan, cu auditorianan cu hasta a wordo elogia pa FAA, ICAO pero tambe pa Union Europeo, pa motibo di registracion di avionnan cu ta tuma lugar na Europa, bao di nomber di Aruba. Sinembargo Corsou si a cay di categoria 1 pa 2, sin por a recupera esaki pa hopi tempo, pero pa un Secretario di Estado Hulandes bin y declara na Aruba sin un Minister ta presente cu el a bin Aruba pa mete den maneho di aviacion civil di Aruba.

 

Pa despues di algun dia, ata Minister Roland Plasterk na Aruba, kende a trata di coregi dicho expression bisando cu no t’asina, pero ta un cooperacion Hulanda kier.

Segun Otmar Oduber, pa tipo di expresionnan aki mester tene hopi cuidao cu nan, pasobra di esaki Aruba ta biba di dje.

Aruba mester ta hopi cuidadoso ora permiti Hulanda kier bin mete den manehonan asina. Cooperacion semper ta posibel, traha hunto cu departamentonan di Hulanda sigur por, sigur ora ta pa mehora un servicio.

 

Pero e interes di pais Aruba, te Arubiano y instancianan na Aruba tin cu defende esaki, segun Otmar Oduber.

 

INSPECTORNAN DI NIVEL

Riba e pregunta, si e por a haya sa caba resultado di e investigacion cu e Inspectornan Hulandes a haci di Aviacion Civil di Aruba, Otmar Oduber a duna di conoce cu no, pero loke e por bisa ta cu e Inspectornan di Aviacion Civil di Aruba, ta wordo considera sigur personanan sumamente capaz, cu sa nan trabao.

 

Pesey Oduber ta lamenta atrobe cu Minister Mike de Meza no ta sali pa defende su departamento y su hendenan. E si ta para pa dicho departamento, pa nan experticio cu nan tin y Hulanda tambe a reconoce e trabao di e Inspectornan di Aruba.

No mas e sistema di funciona, loke nan ta yama e parti di coordinacion, Hulanda kier pa Aruba funciona na mes nivel of mesun forma di Hulanda.

 

Ey, segun Otmar Oduber ta unda Aruba mester para duro riba su pia, pasobra e forma di opera di Aruba su Inspectornan ta cumpli cy reglanan di region, cu a demostra cu e ta funciona. Ta pesey nos ta categoria 1 keto bay.

Y pesey tambe Aruba ta haya su auditorianan for di FAA y di ICAO y di Union Europeo, cu masha reconocimento pa un bon trabao.

 

Pesey Otmar Oduber no por comparti loke cu e Secretario di Estado, Sharon Dijksma a declara, kende kier pa Aruba traha den mesun forma cu Hulanda. Y maske di parti di Gobierno no a duna un opinion, pero Otmar Oduber ta kere cu esey no ta na su lugar, cu manera menciona, nos Inspectornan ta traha na un nivel hopi alto.

 

 

 

 

Leave a Reply

Top