SIMAR a invita directivanan di scol pa un reunion pa trata seguridad di nan maestronan

Directiva di SIMAR ta hopi preocupa cu e situacion escalante y alarmante di falta di seguridad di nos maestronan den scolnan na Aruba.

Nos tur ta conciente cu e Aruba, e alumno y e mayor di awor no t’esnan di antes mas y cu nos mester tuma pasonan serio y liher pa seguridad di tanto alumno y personal den nos scolnan.

 

Ta obvio cu maestronan ta rabia, disgusta y cu nan a ser sacudi p’e acontecimento di siman pasa, caminda un mayor a agredi un docente riba tereno di scol, den presencia di algun colega y alumno.

Simar por a constata cu hopi maestro y a expresa nan frustracion via medionan social y a hasta papia di “pone enseñansa plat” pa mustra nan mal contento.

Y sin ainda dicho agresor a ser deteni. Con Ministerio Publico ta pensa di e susedido aki?

 

SIMAR no a perde tempo y a manda invitacion pa tur directiva di scol pa ta presente na un reunion pa “brainstorm” hunto riba preocupacion-, proposicion- y solucionnan pa loke ta seguridad di nan maestronan.

E reunion aki lo tuma lugar diahuebs 9 di maart 2017 pa 11:00 am den Sala Bruce Crispin na cede di Sindicato di Maestro di Aruba.

Directiva ta spera cu tur directiva por ta representa n’e reunion aki cu lo ta di suma importancia pa cu nan empleadonan y enseñansa en general.

Top