SIMAR lo tuma accion pa cu seguridad den enseñansa

 

SIMAR ta condena e hecho cu cualkier persona of grupo no autorisa tin e posibilidad di subi tereno di scol y comete actonan inaceptabel y contra ley.

Seguridad di tanto alumno como di personal den enseñansa ta tema cu ya tin añas cu a ser trata pa diferente “stakeholder’.

Incluso SIMAR a forma parti di comision di seguridad institui pa Dialogo Social na 2013 y a duna su puntonan di preocupacion y sugerencianan pa mihor calidad di seguridad na pia di trabou den e raport: “Werken naar een veiliger Aruba”.

 

Mucho di esaki no a tuma lugar pa loke ta enseñansa y pa colmo e tema enseñansa nunca a yega na turno den Dialogo Social.

Despues di agrecion di un maestro cu a conduci na protesta silencioso den veld dor di bisti na preto y bishita den forma di manifestacion serca Minister di Enseñansa, a implementa un codigo di conducta, cual SIMAR ta kere MESTER bay cas di cada alumno y studiante pa tur actor ta na altura di su contenido y proceduranan den cualkier caso.

 

Loke ta necesario ainda ta realisacion di un protocol pa cu proteccion di e maestro directamente, cual inicialmente tabata peticion di SIMAR na Minister di Enseñansa. Entre otro ora tin acusacion contra un maestro, ta pone su persona riba “non actief” pa haci investigacion (den mayoria di caso sin scuch’e) y e procedura di investigacion actual no ta cana debidamente y ta perhudica e maestro.

 

No tin ley pa proteha e maestro directamente. SIMAR ta di opinion cu mester traha urgente tambe na concretisacion di maneho na momento di incumplimento di alumno y mayor.  Tambe mester bay mira unda por traha n’e problemanan social cu maestronan ta enfrenta tur dia na pia di trabou y na solucion p’e falta di personal di sosten di instancianan cu ta traha den relacion cu ense ansa.

 

SIMAR lo yama un reunion di urgencia cu directivanan di scol pa propone pa conhuntamente bay traha na un plan strategico pa bin na accion y solucion a corto plazo pa seguridad den cada scol aki na Aruba.

Alumnonan tin derecho y ta central, pero nan y nan mayornan tin deber tambe di tin entre otro respet y balor p’e maestro cu como empleado tambe mester sinti su mes sigur y balora na pia di trabou.

 

 

Leave a Reply

Top