SIMAR ta condena falta di respet y agrecion di maestro

 

Hopi ta bisa cu ta increibel cu un mayor ta tribi di subi tereno di scol cu intencion premedita di agredi un maestro. No! No ta increibel.

E ta un realidad amargo, cu tur dia maestronan ta teme pa sosode cu nan.  E impacto di e suceso aki riba empleadonan den enseñansa ta grandi y hopi ta frustra y disgusta cu loke a tuma lugar.

Hopi ta puntra nan mes ta cuanto y kico mas nan mester tolera.

 

Cu un maestro a actua debidamente of no cu su alumno no t’e caso. Loke ta concerni SIMAR t’e seguridad den e edificio cu yama scol.                                                                                           No ta prome biaha cu algo asina ta tuma lugar y cada biaha e ta bira mas y mas grave. Cada maestro ta pidi tur dia pa no haya nan mes confronta cu problema di e indole aki.

Peor ainda ta spera cu nunca lo haya nan mes confronta cu morto violento na pia di trabou.

 

No por generalisa, pero respet pa maestronan di scol a baha drasticamente, tanto dor di alumno, como di mayor. Esaki debi na mentalidad di mayornan awendia y dor di educacion y falta di norma y balor for di seno di cas.

Problemanan social ta refleha den scolnan di tur tipo y ta parti grandi di frustracion di maestronan cu mester atende esakinan y usa hopi tempo na educa enbes di duna les.

 

SIMAR a trece dilanti na diferente Minister di Enseñansa y di Husticia y na comision di enseñansa di Parlamento, cu mester duna extra castigo na agresornan di maestro di scol. Esaki pa planta mas respet, cu a bay perdi den transcurso di añanan.

Tambe a bisa na varios ocasion cu nos mester percura pa seguridad di alumnonan y di cada maestro na pia di trabou.

 

Mester tin security na entrada di cada scol y mester percura pa infrastructura ta cuadra cu exigencianan stipula den ley. No obstante cuanto esaki ta costa.

Mas cu claro ta preferibel inverti directamente den enseñansa, manera Minister di Enseñansa a menciona den un comunicado, pero seguridad di esnan cu ta forma e ciudadanonan cu ta futuro profesionalnan di bo pais, no tin prijs.                                                                                                                                               Directiva di SIMAR ta desea e maestro agredi pronto recuperacion y hopi forsa na su persona y na su coleganan.

Top