SIMAR ta cuestiona negligencia di EPI Sector Economico

Docentenan di Sector Economia a cansa. Esaki ta comprendibel ya cu pa añas e docentenan di gym ta traha den un situacion laboral inaceptabel.

Despues di a purba pa medio di diferente carta y combersacion cu tanto management, como directie y DPS, e docentenan no tabatin exito.

 

Studiantenan tambe a “walk out” na 2015 pa diferente di e mesun puntonan di atencion cu nan ta trata awe. Mientrastanto un otro aña escolar a habri e organisacion den e mesun situacion. Pese yayera mainta, a bolbe surgi un walk-out, pero no solamente di Sector Economico, pero tambe di Sector Cuido.

 

Docentenan di EPI Sector Economia a dicidi di pone trabou abou pa motibo di disgusto ya cu nan ta celebrando 20 aña di existencia, mientras cu docentenan di gym y studiantenan ta sin un sala di gym.

Na luna di november 2015 e docentenan a sali for di scol y a bay entrega un carta na Minister Hooyboer-Winklaar  den cual a mustra nan disgusto.

 

Tambe a entrega e mapanan di e gymzaal cu lo mester ser construi pa EPI. E splicacion duna dor di Minister tabata cu EPI mes a dicidi di duna otro proyectonan prioridad.

Minister na su turno lo a laga sondea e posibilidad di construi un gymzaal mas grandi cu esun planea na Princes Amalia Basis School y lo a purba bin na un areglo pa EPI haci uso di esaki, mientras cu lo a construi un pa EPI.

Mientrastanto e scol nobo a ser inaugura y e docentenan a haya notificacion cu uso di e gymzaal pa EPI no lo ta posibel.

 

Otro promesa cu a bin dilanti dor di directie di EPI/DPS tabata cu lo a construi un “overdekte” como solucion riba termino corto y cu esaki lo a ser sera despues di tempo. Nada di e “overdekte” aki a bira realidad.

SIMAR ta di opinion cu traha den e condicionnan aki absolutamente no ta aceptabel, specialmente sabiendo cu ley ta protehe tanto e docente como e studiante cu articulonan cu ta papia di e.o. temperatura maximo, grandura di localidad, sombra y seguridad.

E situacion aki ta contra di tur norma describi den nos leynan.

 

Peor aun sabiendo cu awendia, cu “global warming” y tur efecto di cambio riba clima, docentenan den klas sin airco mes ta traha den un temperatura entre 32 cu 38 grado cu ta sinti manera 40. E docentenan aki, hunto cu studiantenan, ta haci gym den e higra di solo cu temperatura mas halto ainda.

 

SIMAR ta enfatisa cu e accion aki no tabatin nada di haci cu politica, sino mas bien cu frustracion cu a acumula y a culmina den expresa malcontento na inicio di otro aña escolar. Expresion den un manifestacion cortico cu ta derecho di nos ciudadanonan.

SIMAR tabata presente n’e accion pa sostene e causa y lo sigi e desaroyo di e asunto aki di cerca.

Nos ta spera cu e docentenan aki haya oido y cu pronto lo bin solucion n’e problematica aki.

 

Top