Sindicato di Polis kier pa Mando Policial institui un investigacion pa sa con tin miembro di prensa tin radio di polis

Presidente di Sindicato di Polis, Juan Gomez a duna di conoce cu SPA lo manda un carta pa Mando Policial, cu e peticion pa institui un investigacion pa sa con por ta posibel cu casi tur miembro di prensa, tin un radio policial y asina ta scucha tur loke ta tumando lugar.

Juan Gomez a bisa esaki, despues di e incidente cu a conduci cu te awor tin 4 Polis deteni, sospecha di maltrato pisa di un persona na Paradijs ora cu nan a bay duna asistencia.

 

Pa ora e prome patruye policial a yega, ya tabatin un miembro di prensa, pa ser exacto di 24Ora.com presente. E kier sa con esaki ta posibel?

No ta prome biaha cu prensa ta prome cu Polis mes y na opinion di SPA, esaki no ta bon, pasobra hopi biaha e fotografonan ta strobe investigacion di Polis.

 

Un tempo prensa por a sigui Polis via di scannernan policial, cu por a wordo cumpra. Ta masha hende tabatin un scanner asina, pa nan por sigui tur loke Polis ta haci.

Esey a pone cu Polis mester a bay cu modernism y busca forma di comunicacion mas modern. Y a haya esaki, te cu a wordo bisa, cu no tin un forma pa descifra e canalnan di Polis.

Pero despues di algun tempo, ata prensa tin atrobe e posibilidad pa scucha Polis. A ser bisa tambe, cu tur radio di Polis tin un GPS aden, y como tal, si perde un radio mes, nan lo sa unda esaki por ta.

 

Di acuerdo cu Presidente di SPA, Juan Gomez, e tin tur respet pa trabao di Polis, pero no por t’asina cu nan ta birando un estorbo pa trabao di Polis. Pesey a dicidi di pidi Mando Policial institui un investigacion pa sa con tin periodista cu tin radio di Polis of pa sa con nan ta sigui tur loke ta pasa riba Centrale Post.

Manera Juan Gomez mes a bisa, cu por ta t’e propio Polisnan lo ta colabora cu nan amigonan periodista pa haya un radio asina den nan poder. Loke sigur no ta bon.

Pesey Presidente di SPA kier claridad di esaki.

 

 

Leave a Reply

Top