Sindicatonan na Beijing ta haña informacion tocante di filosofia di haci negoshi di China

BEIJING – Despues di un promé siman intensivo di entrenamento na Beijing, capital di China, sindicatonan STK, SGTK y SSK ta concluí cu nan a haña bon informacion tocante di e filosofia di haci negoshi di e pais oriental.

E sindicatonan ta forma parti di un delegacion di 24 persona cu, riba invitacion di e compania estatal di China, Guangdong Zhenrong Energy Company Ltd., actualmente ta participando na un entrenamento di tres siman na China.

E sindicatonan ta indicá cu si Còrsou kier desaroyá su mes manera China ta haciendo, Còrsou mester considerá na aplicá un strategia manera esun cu China ta aplicá, esta di “One Belt One Road”.

 

A splica e delegacion na placa chiquito e filosofia di haci negoshi cu China ta usa. Na aña 1978 China a iniciá un reforma económico y na aña 2009 e pais a intensificá esaki. Esaki ta basá riba desaroyo, sistema bankario, regulacion y un forma specífico di haci negoshi.

Den e último añanan China a conocé un crecemento económico di mas cu 6.5% pa aña, cual e pais kier promové tambe na Sur América y Caribe.

 

Pa garantisá continuacion di e crecemento aki, China a desaroyá un strategia bou di e nòmber “One Belt One Road”. Esaki ta un strategia di desaroyo cu ta sali for di principio di igualdad y beneficio mutuo cu rèspèt pa otro pais y teritorio.

China kier logra esaki cu cooperacion bilateral y tambe multi-lateral.

E reforma económico di China ta basá riba un proceso pa deal cu crísis económico y corupcion y e manera con mester ahustá sistema di educacion pa futuro.

E planificacion ta basá riba un maneho di planificacion largo, pero tambe uno còrtico di 5 aña.

 

Pa loke ta trata maneho di proyecto operacional, na China ta aplicá un sistema di planificacion, regulacion, contròl (monitoria y training) y ehecucion den tempo definí (WBS: Work Breakdown Structure).

Ta importante pa garantisá un periodo realístico cu ta duna seguridad pa ricibí “return of investment”.

Pa loke ta trata e industria di refinacion di petroleo, China ta usa tecnologia ultramoderno cu ta producí productonan final di calificacion internacional, sinembargo cu un nivel di polucion hopi limitá.

 

META

E meta di e entrenamentu di tres siman na China ta pa prepará yiunan di tera p’e proyecto cu Guangdong Zhenrong tin pa modernisacion y upgrading di e refineria y inversion den un planta di gas natural líkido (LNG) na Còrsou.

A hinca un programa intensivo den otro p’e delegacion p’e promé siman, cu ta consistí di e siguiente tópiconan: Integracion y intercambio di cultura: Desaroyo di economia mundial y di China en particular: Maneho di proyecto operacional y regulacion.

 

 

 

Den e promé seccion, loke a resaltá mas pa loke ta trata e sistema di traha y custumbernan di e pais oriental, t’e rèspèt pa herarkia.

Considerando cu China ta un pais comunista, den e sistema aki un decision tumá pa estado ta keda implementá masalmente den e pais a base di teamwork.

Cu un sistema di haci negoshi conforme reglanan estableci, bon prepará y respetando custumber y leynan di otro nacion, ta traha conhuntamente pa producí y asina saca mayor ganashi.

Alabes ta yuda otro paisnan crece económicamente, di forma cu ta garantisá cu e desaroyo económico Chines ta duradero.

 

DELEGACION

E delegacion cu ta sigui e entrenamento na China ta consistí di representante di diferente sector. Ademas di representante di sindicatonan cu afiliacion relacioná cu refineria, tin tambe representante di Universidad di Còrsou (UoC), FEFFIK, Curaçao Refinery Utilities (CRU), Ministerio di Desaroyo Económico (MEO), Ministerio di Asuntonan General (AZ), Refineria di Còrsou (RdK) y Team di Proyecto Multi-Disciplinario (MDPT).

 

E delegacion di Corsou a keda ricibí pa Zhenrong Group Corp. di cual ta forma parti Guangdong Zhenrong Petrochemical Comp., China Zhenrong Holding Ltd., Guangdong Zhenrong Energy Co. Ltd.. Tambe e delegacion a topa cu representante di Confucius Institute of China, China University of Petroleum (Beijing), China Testing International Company y Division of Development and Planning.

E delegashon ta hospedá na campus di China University of Petroleum caminda mayoria parti di e entrenamento ta tumando lugar.

Top