Sint Maarten ta uza AZV como ehempel pa su seguro di salud

Minister di Salud Publico, Deporte y maneho di nos Grandinan, dr. Alex Schwengle tabata anfitrion recientemente di su homologo di Sint Maarten, Minister Emil Lee, kende ta sondeando diferente oportunidad y opcion pa cu colaboracion y siña di e “best practices” di cada pais for di otro.

Minister Lee a comenta cu particularmente e interes ta actualmente pa siña mas tocante AZV, y su funcionamento, su retonan y su puntonan fuerte, como cu Sint Maarten ta trahando duro rib’e desaroyo di nan mesun programa di seguro di salud general, esta un “universal health care program”.

E mandatario ta subraya cu e ta e cos di mas logico pa traha hunto y comparti informacion y experiencia, y ta importante pa siña di otro.

El a agrega cu den e caso aki Sint Maarten kier siña mas tocante di AZV, tanto di parti di e organisacion, como e parti di leynan, cual ta cay bao di Gobierno; y kisas tambe tin cosnan cu Aruba ta interesa pa Sint Maarten comparti cu Aruba relaciona na otro topico y e leynan y proceduranan cu ta bay cu e leynan aki.

Semper tin beneficio den cooperacion y trahamento hunto, Minister Lee a laga sa. Minister Alex Schwengle a splica cu e tipo di cooperacion aki den e area di cuido di salud ta algo cu a cuminsa cu e Health Care Conference organisa na Aruba na 2015.

Top