Sir Richard Branson a bay hopi impresiona cu e biento na Aruba

A practica kitesurfing na Fishermen’s Huts

 

Pa Sir Richard Branson no tin duda cu biento ta un gran aliado di pais Aruba. Ademas di conoce e parke di molina di biento na Vader Piet cu ta genera actualmente 14% di e electricidad cu nos ta consumi, e empresario mundial a probecha di e bishita na nos isla pa practica un di su deportenan faborito, esta Kitesurfing.

 

Na Fishermen’s Huts, el a topa cu dos profesional di renombre, esta Jeroen Westrate y Annabel van Westerop caminda el a core un poco y disfruta enormemente di su experiencia, confesando tambe cu e lo kier regresa pa haci mas.

“Mi ta stima Aruba. Awo boso ta combina boso energia cu e bienta y boso ta combina boso kiting cu e biento, p’esey mi ta kere cu ta e miho luga pa bin”, Branson a bisa.

 

E ta practica e deporte pa ultimo 12 aña y a reconoce e forsa di biento na Aruba remarcando cu mas bo bay afo, bo ta haya e miho condicionnan. Como parti di su bishita algun siman atras pa ceremonia di groundbreaking di Sunrise Solar Park na Lago Heights, el a bishita diferente proyecto di Aruba cu e tin un interes particular den dje manera Parke Solar na aeropuerto, ‘Smart Community’ na Kibaima y Parke di Molina na Vader Piet.

Tambe e kier a bay na un beach pa practica kitesurfing ya cu a yega di tende di con bon esaki ta na Aruba.

 

Ademas, Branson tabata consciente cu Aruba tin beach apto p’esaki tanto na costa zuid como na e costa Noord. E situacion di oilspill cu a afecta nos isla hustamente algun dia prome, a pone cu a opta pa bay na Fishermen’s Huts.

“E tabata dushi; e tabata un bon careda”, Branson a expresa apenas cu el a sali for di beach, ya cu segun e mes a bisa, no kier a laga Minister Presidente Mike Eman y Jose Maria Figueres di Carbon War Room riba beach largo tur bisti na camisa y dashi. “Mester bin bek si”, el a añadi.

 

Annabel a remarca cu Branson a haci bon y e tabata impresiona.

“El a maniobra y definitivamente a tuma e biento. Aki’fo ta dificil, pero e tabata special.”

Na esaki Branson a comenta cu p’e kitesurf t’e miho deporte cu tin y cu si tin algo cu Arubianonan mester sa di e deporte ta cu e ta hopi mas facil di loke e ta mustra

El a recomenda tuma 4 pa 5 ora di les cu un instructor p’asina cuminsa disfruta di un di e satisfaccionnan mas grandi.

Tambe cu awendia e deporte ta hopi mas sigur compara cu 10 aña pasa ora cu ainda tabata trahando rib’e ekipo y su prestacion.

“Mi ta recomenda altamente na boso, sin importa ki edad bo tin”, Branson a comenta.

 

Weststrate tambe a keda masha complace cu e bishita di Branson pa kitesurf.

“Obviamente e cabayero aki semper ta bon bini na Aruba y nos lo kier kite cune mas sigui”, asina e kitesurfer y empresario local a bisa.

Oficina di Ministerio di Asuntonan General a coordina e encuentro aki cu nos kiters local y ta gradici Jeroen y Anabel pa nan cooperacion.

 

Prome Minister Mike Eman a expresa n’e momento ey su deseo di traha mas di cerca cu e sector aki y asina haci loke ta posibel pa su desaroyo y promocion.

E siman aki Premier Eman a cumpli riba su prome y a tene un prome reunion na Bestuurskantoor y tambe a atende e ceremonia di entrega di premio di Aruba Hi Winds 2017.

Top