SKOA su skolnan ta birando chiquito, no tin mucho espacio pa pone mas alumno

Sra. Josette Daal, Directora di SKOA a expresa su preocupacion pa loke t’e aumento di alumnonan pa cada skol cu ta resorta bao di SKOA.
T’asina cu for di 2 aña, e skolnan a cuminsa crece, esta ta hayando mas y mas alumno. Tuma como ehempel un kleuterschool, e mucha ta drenta cu 4 aña. Tin un palabracion for di basta aña caba, cu pa klas na kleuterschool, lo por tin 27 alumno pa klas.
Y asina tambe e ta valido pa 1ste klas, pero segun Josette Daal, e ultimo 3 añanan ya e klasnan a bira di 30 alumno.

Tuma ehempel di Aurora Kleuterschool na Tanki Leendert, cu tabata un kleuterschool cu no tabata yena mesora e prome simannan. E tabata un kleuterschool cu pa luna di october ta yen, pero aworaki hacienda inscripcion, tur skol di SKOA ta yen.
Yen cu 28 pa 30 mucha den un klas.
Un klas cu 25 alumno ya caba ta hopi y cu un solo maestro, ta hop dificil. Pasobra cada mucha ta exigi hopi atencion compara cu 40 aña pasa.

Aworaki SKOA ta preocupa, e.o. e muchanan cu ta caba 6de klas y mester bay MAVO, pero no tin lugar pa tur. Awor cu SKOA ta den preparacion p’e aña escolar nobo, ta sinta kibra cabez con ta bay ubica tur e muchanan aki.
E flow di muchanan a bira mucho mas hopi. Awor mester bay haci dos extra kleuterklas, cu speranza cu lo por haya docente pa nan tambe, segun Josette Daal.
Ta pensa pa pone asistente den un klas, pero atrobe e pregunta, tin suficiente asistente?

E skolnan na San Nicolas, si a bira mas chiquito, debi cu e refineria tabata sera, y e famia a muda bin biba mas serca di trabao, esta pabao di brug. Y no tin suficiente mucha pa skolnan na San Nicolas.
Pero e posibel solucion lo por ta, si mayornan por permiti nan yiu subi bus p’e bay skol na San Nicolas, segun Josette Daal. Poco poco por mira cu e skolnan den barionan tambe ta yenando.

E situacion di pais Aruba, ta conoci pa Gobierno. E ta un problema serio, pa por sigui duna enseñanza di calidad na bo muchanan.
Ademas no tin suficiente cupo y no tin suficiente maestro pa duna e muchanan enseñanza. No por sigui haci e grupo di mucha mas grandi pa klas, pasobra e ta un presion grandi, pa tur hende y esaki no ta bon pa comunidad di Aruba.

Den pasado, ora cu Aruba a haya e problema aki, a bin cu trailers pa haya espacio pa ubica mas mucha. E reto pa pais Aruba ta, cu mester di mas skol.

Top