SMFA a reparti buki tocante di nos monumentonan di Aruba pa mas cu 9 mil alumno di scol basico

 

E ultimo añanan banda di e metanan principal di Stichting Monumentenfonds Aruba (SMFA) cu ta restaura y mantene monumentonan tambe nos a bin ta enfoca mas riba conscientisacion y educacion tocante nos monumentonan.
SMFA ta hopi contento awe di por a presenta e buki di monumentenwandeling na Scol Primario Kudawecha.

E proyecto aki a cuminsa mas cu un aña pasa ora cu dos studiante Magaly Kelly y Sharine Aponte cu tabata finalisando nan estudio na IPA a acerca nos cu e interes pa haci nan proyecto social pa SMFA. E resultado di e proyecto nos tin awe den nos man.

Un caminata den Oranjestad y San Nicolas pa muchanan di entre 6 pa 12 aña caminda na un manera dibertido nan por siña mas di nos monumentonan.
E buki no solamente ta duna informacion di e monumentonan pero tambe ta conta un tiki di e historia di Aruba e historia di Oranjestad mes y tambe di San Nicolas.
Den e paseo aki ‘Fogonsito’ un personahe crea pa e studiantenan lo guia e muchanan dor di diferente monumento caminda cu nan lo haya tambe tareanan y of datonan curioso tocante e monumentonan.
Fogonsito ta un fogon chikito basa rib’e logo di Stichting Monumentenfonds Aruba.

E ta representa un detaye di e casnan di cunucu cual ta un di tipo di monumentonan cu mas nos tin na Aruba.

Y despues di finalisa e paseo e muchanan por subi riba website di Monumentenfonds aruba cual ta www.monumentenfondsaruba y download completamente gratis un wega di kwartet caminda e monumentonan di Aruba ta e tema principal.
Nos ta hopi contento cu e resultado final di e proyecto aki, danki na Adctra nos a dune un bunita diseño.
Aña pasa SMFA a celebra su binti aniversario y a presenta esaki na e invitadonan cu e opcion pa haci un contribucion na e proyecto aki den forma di un regalo di aniversario y nos ta hopi agradecido na e contribucion p’asina por a duna forma na e buki.

Banda di esaki tambe nos ta gradici na VNO y ATA cu a contribui na cu nos por a laga imprimi e buki pa tur alumnonan di scolnan basico di klas 1 te cu 6 di Aruba.
Den e dianan aki e scolnan lo ta ricibiendo e bukinan p’asina e fin di siman aki di celebracion di nos himno y bandera nan por keiro hunto cu nan famia tambe y siña un tiki mas di nos monumentonan cu ta parti importante tambe di nos herencia cultural.

Top