Sospechoso principal mester pasa di Paul Croes pa Gabinete Mike Eman, segun Parlamentario mr. Juan E. Thijsen (MEP)

Parlamentario mr. Juan E. Thijsen mescos cu tur hende na Aruba tambe ta sigui desaroyo politico y hudicial referente e ola di corupcion na Aruba. Ministerio Publico ta man yen di trabao y a cuminsa detene hende den e caso na unda Minister di Trabou, Asuntonan Social y Hubentud ta ser acusa di varios delito serio.

 

Paralelo cu e caso di Paul Croes, Aruba ta enfrentando acusacion otro manera rib’e benta y corupcion cu tereno di pueblo. Tambe tin acusacion contra ex Minister di Turismo y lider di e partido nobo POR, Otmar Oduber; cu Oduber lo a hinca placa di fondonan publico den su saco. Ainda ta pendiente e acusacion serio di parti di Dowers cu Otmar ta meti den traficacion di droga, etc.

 

Pues segun Parlamentario Thijsen, e problema cu corupcion cu permisonan di trabao a amplia masha hopi mes y e ta kere cu Ministerio Publico tin cu amplia nan investigacion tambe.

Ya no por papia mas di e sospechoso Paul Croes sino di e sospechoso Gabinete Mike Eman, ya cu e mayoria di Ministernan ta envolvi.

Paul Croes mes, de Meza (permisonan CITGO), Benny Sevinger permiso y terenonan, ex Minister Otmar Oduber (tambe tabata encarga cu permiso), hortamento di fondonan publico y meti den traficacion di droga y finalmente Mike Eman mes sigur den e terenonan y tambe tapamento di tur e fechorianan y esun responsabel pa nan.

 

E Parlamentario di MEP ta duna Ministerio Publico e beneficio di duda y ta kere cu te awor Ministerio Publico a mustra boluntad pa actua.

Di otro banda tambe tin e aspecto di capacidad di Ministerio Publico di por hiba e escandalo gubernamental y hudicial mas grandi di nos historia na un desenlace na unda husticia ta prevalece.

No ta e prome caso ya cu den pasado a conoce e caso di ex Minister Berlinksi, ex Prome Minister Henny Eman y ex Minister Tico Croes. E experiencia cu e resultado final no tabata mucho bon y ta spera cu e biaha aki e bay miho.

E Parlamentario ta kere cu e biaha aki Ministerio Publico tin bon asistencia di instancianan local y di Reino.

 

Aparte di e parti hudicial cu ta coriendo su caminda, tambe tin e parti politico na unda ya ta bisto cu den e siguiente eleccion pueblo mester bisa un no fuerte contra e coalicion AVP/POR ya cu ambos partido ta envolvi den casonan di corupcion.

Segun Parlamentario Thijsen, e problemanan na Aruba ta demasiado grave y urgente pa laga otro 4 aña mas den man di un Gobierno corumpi. Parlamentario Thijsen y partido MEP ta cla pa resolve problemanan serio di nos pais y percura pa un miho calidad di bida na Aruba.

Hunto sin miedo pa e cambio.

Leave a Reply

Top