Sosten den preparacion pa orcan Irma den parti Caribense di Reino – Bonaire a bira e refugio pa diferente avion

PHILIPSBURG – Orcan Irma a pasa di ayera nochi te cu awe mèrdia, ora Hulandes, riba e islanan Sint Eustatius, Saba y Sint Maarten.

Den e contexto di Reino e Ministerionan conserní a haci e preparacionnan necesario pa sostené e islanan, minimalisá daño y enfrentá posibel consecuencianan.

 

Mientrastanto por a tuma nota cu Bonaire a bira e isla di refugio pa varios avion for di Puerto Rico y tambe pa otro companianan di avion priva. Ayera merdia tabata masha druk mes na Flamigo Airport.

Mientrastanto casi 100 militar Hulandes a sali for di Còrsou y Aruba rumbo pa Sint Maarten, Sint Eustatius y Saba.

Ademas dos barco di Marina a sali for di Còrsou y Aruba pa entregá èxtra militar, Cruz Corra y suministro auxiliar despues di e pasada di Irma.

 

Hulanda a ofrecé asistencia y sosten, tambe pa remediá cualkier daño despues di pasada di e orcan.

Un team di impacto di tempo cu representantenan di e Ministerionan di Infrastructura y Medio Ambiente (I&M), Seguridad y Husticia (V&J), Asuntonan Económico (EZ), Defensa y Ministerio di Asunto Interno y Relacion di Reino (BZK) conhuntamente cu representantenan riba e islanan ta colaborá pa por atendé cualkier otro pregunta di emergencia rápidamente.

 

Minister Roland Plasterk di BZK a papia extensivamente y ta mantené contacto cu Minister Presidente Marlin di Sint Maarten y via e Representante di Reino kende t’e autoridadnan na Sint Eustatius y Saba.

Segun KNMI e código còrá ta na vigor. N’e momentunan aki Irma ta un orcan di categoria 5.

 

Den pasado a haci inversion caba pa haci e islanan mas firme pa un posibel orcan, y asina minimalisá e daño mas tanto cu ta posibel. Asina a instalá hopi liñanan eléctrico bou di tera y a mehorá plannan di desaster.

 

 

Leave a Reply

Top