Spuiters ta propina Pizza Hut Monster nan prome derota den un forma elegante planteando respet

Campeonato HEINEKEN di Aruba Softball Bond dedica na dos baluarte sra. Bertha Wolf Croes y Eugenio “Tan” Helder a inicia den gran forma.

Despues di un desfile colorido y bunita y alaves después di e ceremonia unda e. o. a homenagia e dos baluartenan e dos ekiponan den categoria AA a midi forsa.

 

Angelo Arnold a tuma e monticulo pa Spuiters, mientras e veterano Arjen Mathilda a inicia pa Pizza Hut Monsters. Spuiters ta coy bentaha 4-0 den e prome 2 inningnan, pero Mesora Pizza Hut Monsters ta reacciona na mesun cu 5 careda den bom di 3 inning pa bolter e score 5-4 na fabor di Pizza Hut Monsters riba algun hit den combinacion cu 2 error y un homerun inside the park di e hoben Lenny Ashby Junior.

 

Spuiters, sinenbargo, no ta entrega y den cabes di 5 inning 2 coredor ta yega base unda Carlos Wester ta conecta un “clutch triple” cu dos out pa bari base impuhando 2 careda pa bolter e score 6-5 na favor di Spuiters. Angelo Arnold ta preta brasa den bom di ultimo inning ponchando Rolando De La Cruz lagando e cu e carabina riba su lomba pa despues sali facil di Richinell Matos cu un fly pa right y terminando e wega dominando Derward Ruiz cu un rolling pa pitcher pa seya e victoria.

 

Angelo Arnold ta resulta pitcher ganador lansando un “2 hitter” silenciando Pizza Hut por total y Arjen Mathilda ta bay cas cu e derota. Spuiters 6 careda, 3 hit, 3 error y a laga 1 coredor na base. Pizza Hut Monsters 5 careda, 2 hit, 1 error y 1 coredor laga na base.

Miho bateadornan pa Spuiters ta Gilward Wester 1-1, Carlos Wester 2-1, Dereck De Castro di 2-1. Pa Pizza Hut Monster a conecta e unico dos hitnan Jerold Martijn di 2-1 y Lenny Ashby tambe di 2-1.

 

Mester remarca si cu algun hungador di Pizza Hut Monster a scoge pa subi Facebook y insulta miembronan di umpires y directiva di ASB publicamente cual sigur ta inaceptabel riba un wega cu nan a perde. Esaki ta inaceptabel y tin regla estableci den rule book cual nan lo mester bay deal cu ne awor y sigur cu man duro.

Corda cu bo ta rebaha bo propio sponsor “Pizza Hut” cu actitud asina, kende ta invertiendo pa promove e deporte y su negoshi. Deporte ta crea carácter y disciplina den un ser humano y na final di dia perdiendo no prome wega den campeonato unda tin mas di 23 wega ainda pa hunga no ta refleha cu algun deportista por reacciona cu un actitud faltando tur clase di respet publicamente di e forma aki.

 

Campeonato lo continua diasabra awor riba veld di Pos Chikito unda pa 5:00pm den categoria A-Klas Celebrities vs. Blackhawks y pa 7:00pm Logros vs Predators. Dialuna 22 di mei na Pos Chikito den AA Balashi Premuim vs. Piratas. Fast Pitch a la carga.

Leave a Reply

Top