Sr. y sra. Jansen di San Miguel ta aproba y compronde bon e maneho di Gabinete Mike Eman II

San Miguel, mescos cu hopi otro bario di Aruba, ta pidi pa Gobierno mehora e infrastructura poniendo asfalt, verkeersdrempels y luz publico.

Visiblemente Gabinete Mike Eman II ta trahando riba tur tres aspecto y e programa di ‘Luz den Bario’ ta un di e esnan mas prominente.

Karen y Axel Jansen ta un pareha masha cordial y alegre cu e aña aki ta bay celebra nan 40 aniversario di matrimonio y tin casi mesun tempo ta biba na San Miguel.

 

Sra. Jansen ta conta cu e bario ta uno masha trankilo y cu dushi biento. Claro cu awor tin hopi mas cas compara cu prome, pero afortunadamente e ambiente a keda e mesun dushi.

No ta prome biaha cu nan ta haya bishita di Prome Minister na nan cas, pero e biaha aki sigur tabata special.

Minister President Mike Eman a bay na San Miguel diahuebs mainta pa personalmente informa nan cu nan caya ta haya iluminacion y tambe invita nan pa tey pa sendemento di e prome luz den e becindario.

 

Prome Minister tin ta haci e bishitanan den bario pa basta aña caba y ta precisamente durante e bishitanan aki cu Prome Minister ta haya tende di e ciudadanonan cua t’e necesidadnan pa nan bario.

Den algun bario e por ta movecion di awa, den otronan mester asfalt of iluminacion.

Den caso di e parti aki di San Miguel, e bisiñanan a identifica varios aspecto cu mester atencion y un importante ta iluminacion.

Mescos cu na otro barionan cu ya a haya nan iluminacion publico, Prome Minister ta yuda instala e prome luz den e bario cu ta simbolisa e comienso di e trabounan cu tecniconan di Elmar NV ta completa rapidamente despues den henter e becindario.

 

Pareha Jansen ta masha satisfecho cu maneho di Prome Minister Eman y su ekipo di trabou. Adicional na Luz den Bario, sra. Jansen a gaba hopi e manera con a drecha entrada di waf di crucero.

“El a keda masha bunita,” asina el a bisa comentando tambe cuanto crucero el a wak drenta y con Polis ta presente pa wak cu tur cos ta cana bon den e area.

“Mi ta spera Mike keda 4 aña mas p’e caba cu su proyectonan,” t’e deseo cu sr. Jansen a expresa despues di e bishita di Prome Minister; na loke su señora a añadi: “Esun cu no kier mira, core rond di Aruba p’e mira.”

 

Ningun ta wak base den e ponencia di criticonan cu a crea demasiado debe paso t’asina cosnan tin cu bay.

“Bo no por paga bo auto cash, ni paga pa bo cas cash; mi tambe a haci asina. Bo tin di fia pa bo por inverti,” sra. Jasen a comenta.

 

Top