Studiante Arubiano di Medicina na Leiden, Mandy Villasmil “Bo ta wak kico Gobierno ta haciendo pa Aruba y cu tin un enfoke grandi pa studiantenan bin bek”

Entre e grupo grandi di studiante cu a atende e presentacion duna pa Minister President Mike Eman, tabata presente Mandy Villasmil.

E conclusion cu e hoben ta saca di e encuentro ta cu bo por wak kico tur Gobierno ta haciendo pa Aruba y cu tin un enfoke grandi pa studiantenan bin bek nan isla.

“Esey mi ta haya great, pasobra Aruba tin mester di hende,” Villasmil a conta.

 

Prome Minister a sinta cu un cantidad di studiante Arubiano na Hulanda diarazon ultimo na ‘De Winkel van Sinkel’ na Utrecht.

Como un studiante di medicina na Universiteit Leiden, ora cu Mandy Villasmil caba cu e parti aki di su estudio, ainda e lo mester completa un specialisacion.

E ramo cu e ta interesa aden aworaki ta investigacion, algo cu no tin na Aruba. Asina mes, e ta contento di wak cu pa hopi otro specialisacion medico, si tin oportunidad.

 

Ampliacion di hospital, por ehempel, ta habri caminda pa amplia e cuponan di trabou den sector medico.

Den su presentacion, Prome Minister Mike Eman a splica di con kier haci di Aruba e conexion entre Europa y America, pero tambe con kier crea un industria di conocemento.

“Mi ta kere ta hopi duidelijk cu Aruba ta un pais cerca di Sur America, pero parti di Reino Hulandes.

E ta perfecto, e tin tur aspecto di yen cultura rond di dje cu ta haci’e hopi facil pa ta un brug entre diferente pais cu tin.”

 

Mandy Villasmil a indica cu ta great pa wak cu na Aruba no solamente ta traha riba un mihor economia, pero tambe con esaki ta mehora e calidad di bida di e hendenan.

“Aruba mi ta kere tin un potencial hopi grandi; e no ta djis un isla. E ta haci un impacto vooral riba e tereno green y di sostenibilidad.

Tin hende ta acerca Aruba pa conseho riba e tereno di mercadeo. Nos ta un isla asina chikito, pero cu un impacto asina grandi, dus nos tin algo.”

 

 

Top