Studiante di ley na Utrecht, Cirielle Hijmering Minister President tin iniciativa pa scucha y yuda studiantenan Arubiano na Hulanda

Cirielle Hijmering ta un studiante di HBO-Rechten na Utrecht. E mescos cu hopi otro Arubiano sigui estudio na Hulanda, a asisti n’e encuentro cu Prome Minister Mike Eman a sostene e siman aki pa intercambio di informacion y idea.

Cirielle Hijmering a comenta riba su impresion: “E tabata sigur algo hopi atractivo. Mi a comparti opinion cu basta studiante caba y hopi hende a hay’e un presentacion informativo. Prome Minister a splica amplio di e bentahanan cu ta bin pa nos awor como studiante ora nos bay bek Aruba.

Mi a echt disfruta esaki y mi a ripara cu otro studiante tambe a saca fruto di e presentacion.”

 

E hoben a menciona con Gobierno ta purbando di rebaha e interes di e prestamo pa studiante, cual sigur ta algo cu tin hopi influencia riba e studiantenan pa bay bek nan pais.

“Minister Presidente ta purba di atrae studiante pa bolbe y no keda na Hulanda despues di nan estudio. Bo ta wak cu tin e iniciativa pa scucha e studiantenan y pa yuda studiantenan y mi ta haya esaki, te awor, ta bayendo hopi bon.

Ta beneficioso tambe pa tende kico e studiantenan tin di bisa p’asina Gobierno sa tambe na unda nan tin cu mehora y unda ta bayendo bon caba,” asina e studiante Arubiano a expresa.

 

Algo cu tambe ta dun’e satisfaccion t’e impresion cu tin awor na Hulanda di nos isla.

“Aunke tin parti di Hulanda caminda Aruba no ta conoci ainda, hopi otro caminda e ta bon conoci. Si bo toca e topico di politica cu cierto hende na Hulanda, bo ta tende cu e nomber di Prome Minister ta sali hopi na cla como cu Minister Presidente ta comparti hopi cu politiconan aki na Hulanda.”

 

Cirielle Hijmering ta conta cu den e presentacion el a wak hopi cambio na Aruba, apenas den e 8 luna cu e tin na Hulanda. Esaki ta pone pensa cu aki 4 aña lo ta un Aruba full nobo.

“Mi ta wak cu Aruba a bay hopi padilanti pa bira un Aruba di calidad,” e ta bisa.

Diarazon ultimo Minister Presidente Eman a haci espacio den su agenda di trabou, pa topa cu e hobennan na ‘De Winkel van Sinkel’ na Utrecht.

 

 

Top