Studiantenan a yega bon Hulanda

DEN HAAG – Cu dos vuelo di KLM y un di TUI a yega ayera 1 di augustus un cantidad di 193 studiante Arubano pa sigi un estudio avansa na nivel HBO of Universidad na Hulanda.

Awe, 2 di augustus, un grupo chikito mas di studiante for di Aruba lo yega Hulanda.

Na Schiphol un delegacion consistiendo di directora di Gabinete di Aruba Shandra John, functionarionan di Departamento di Enseñansa di Gabinete di Aruba, studiementor y miembronan di e POC (Plaatselijke Opvang-commissie) a ricibi e studiantenan.

 

Sra. John tabata den e sala di yegada pa saluda e studiantenan. Banda di a duna algun instruccion na e studiantenan pa ora nan bay coy nan maleta y sali pafor di e terminal, sra. John a recorda e studiantenan cu ki meta nan a bin Hulanda.

“No ta tur ora e lo ta bay ta facil, tin hopi reto boso dilanti, pero keda corda semper e meta pakico boso a bin Hulanda. Tambe corda na busca ayudo, conseho y guia na boso mentor y tambe na Arubahuis, ora cosnan no ta bay facil”, asina directora di Arubahuis a bisa.

Finalmente sra. John a desea e studiantenan tur clase di exito den nan estudio.

 

Pafo di e sala di yegada e studiantenan a keda ricibi na un forma bon organisa y a haya instruccion di personal di Cas di Aruba y miembronan di e POC unda nan mester a para den grupo pa warda nan turno pa bay n’e bus cu lo hiba nan na nan ciudad di estudio.

 

Diaranson 2 di augustus e studiantenan lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia necesario den nan ciudad unda pa sigur cuater aña of mas lo biba y studia.

 

E prome aña e studiante ta ricibi guia di e studiementor, pero p’e resto di su estudio e ta cay bou di Gabinete di Aruba.

Finalmenete, Cas di Aruba kier a gradici functionarionan di Schiphol pa nan cooperacion excelente pa por a encontra cu e studiantenan y tur cos a cana masha lihe mes.

 

Rib’e website di Cas di Aruba www.arubahuis.nl tin un reportahe fotografico extenso di e yegada di e studiantenan.

Top