Studiantenan di IPA di tercer aña y nan docentenan tabatin un intercambio interesante cu Parlamento

Diahuebs ultimo ­Presidente di Parlamento ta trece padilanti cu diahuebs, dia 2 di maart 42 studiante di tercer aña di IPA y nan docentenan tabatin un intercambio interesante cu Parlamento.

Na e ocasion aki nan a ser ricibi pa presidente di Parlamento, drs. Mervin Wyatt-Ras hunto cu coleganan Parlamentario sra. Desiree de Souza-Croes, Clarisca Velasquez, Lorna Varlack, Jennifer Arends-Reyes, Evelyn Wever-Croes, Jeffrey Kelly, Chris Dammers, Andin Bikker, Guilfred Besaril y e presidente di e comision di enseñansa Marlon Sneek.

 

E studiantenan a haci nan preguntanan y ricibi contesta di miembronan di Parlamento di diferente fraccion. Tema di e bishita tabata sostenibilidad y desaroyo duradero inclusivo a base di e 17 diferente meta di desaroyo sostenible.

A resalta cu studiantenan y futuro maestronan ta interesa den e situacion, calidad, contenido y personal di nos enseñansa.

 

Wyatt-Ras ta gradici coleganan Parlamentario pa e gran asistencia y nan input.

Nos como politico mester ta ehempel pa e studiantenan y sigur nos ta siña tambe di studiantenan. Despues di e reunion Parlamentarionan a haya diferente punto pa follow up cu Gobierno.

E tin palabra di elogio pa studiantenan cu mayan lo ta maestronan dilanti klas. Nan lo ta e wowo y orea pa cu e muchanan cu nan ta bay educa, lo señala, yuda y referi muchanan cu problema y nan mayornan.

 

P’esey mes ta di importancia pa keda sostene nan tanto den sentido di recurso humano, sosten educativo, pero tambe crea miho infrastructura y ofrece material adecuado y moderno pa por traha cu ne pa educa nos hobennan den un mundo mas digital, rapido y cu mas retonan.

Top