Surhailys Sophia condená pa maltrato di su rival cu sambèchi na Sambil

WILLEMSTAD – E ciudadano Surhailys Sophia di 26 aña di edad dia 7 di augùstùs 2107 a maltratá su rival tambe di fam Sophia barbaramente cu sambèchi den cara. E muher aki tabatin relacion cu e mesun hòmber di fam Raap.

E damanan p’e motibo aki continuamente tabatin keskes cu otro. E víctima Oeki Sophia a bay te na pia di trabou di Surhailys Sophis aya na Sambil pa dal e wanta den cara.

 

Pa colmo anteriormente ya Oeki Sophia a menasá Surhailys vários biaha caba. Dia 7 di augùstùs 2017 pa Surhailys awa a pasa hariña, como tal el a cue un sambèchi warda Oeki Sophia bin numa.

Den cayente di e situacion di bringamento cu a surgi Surhailys Sophia no a pèrdè pa gana, saca e sambèchi zwai e còrta Oeki Sophia den cara for di wènkbrou te na kakumbein.

 

Un herida teribel cu lo nificá un sicatris teribel pa semper p’e víctima ta resultado di e pelea. Surhailys Sophia, en principio tin un bon nòmber na su trabou y ta considerá como un persona amabel, pero pa loke a sosodé no por toler’é na trabou mas.

Surhailys Sophia actualmente ta sperando un babt y lógicamente a tene consideracion cu su situacion personal.

 

Fiscal mr. van Vliet na cierto momento a dirigí algun palabra n’e hòmber Raap, pa ken e damanan a bringa y cu tabata sintá den tribuna siguiendo e caso den Corte.

Fiscal a puntr’é su opinion tocante loke a sosodé. Raap a drei contestá cu e ta percura di cuida su yiunan, anto cu e ta cu Surhailys Sophia y no cu Oeki Sophia.

 

Abogado mr. Hardeveld den e defensa di su cliente Surhailys Sophia a argumentá cu no ta trata aki di un maltrato pisá, pero tanto Fiscal como Huez a mustra e abogado cu den e caso aki e ta mal equiboca y cu e víctima casi a pèrdè un wowo.

Maske e acusado a keda molestiá y pèrsiguí p’e víctima, tampoco no por haci uzo di e argumento di defensa propio, pasobra Surhailys Sophia, claramente a prepará warda e víctima Oeki Sophia bin numa. Esey ta mustra cu tabatin premeditacion.

 

Den e caso di Surhailys Sophia ta trata di un first-offender. E castigo a bira 1 aña di prizon completamente condicional y un periodo di prueba di 2 aña, mas un castigo di trabou di 240 ora despues cu e caba di duna lus.

For di e 240 oranan un descuento di 46 ora (debí cu el a sinta 23 dia caba den prizon). Pues al final ta resta 198 ora di castigo di trabou, sino 97 dia di prizon si Surhailys Sophia no cumpli.

Top