SV Bubali pronto lo conta cu un Mini Soccer Field Professional

Recientemente, Minister Paul Croes a reuni cu comision di infrastructura di Sport Vereniging Bubali p’asina dialoga riba un proyecto sumamente positivo pa e club y e bario di Noord.

Ta trata aki di un Mini Soccer Field p’asina yuda na engrandece e club y e deporte di futbol. E Mini Soccer Field aki lo ta uno cu e midinan oficial di lifida, esta un veld di 50 x 35 meter.

E proyecto na e momentonan aki ta den fase inicial pa cual rason e commission a acerca Minister Croes p’asina yuda na haci e proyecto aki uno posibel.

Minister Paul Croes ta sumamente contento cu e iniciativa aki y a compromente su mes pa hunto cu e comision di infrastructura yuda aloca fondonan necesario p’asina haci construccion di e tereno aki uno real.

SV Bubali a ser funda na aña 1943 y lo ta celebrando su di 73 aniversario.

E club aki, siendo e orguyonan di Noord, tin plannan grandi p’e organisacion y cu meta final pa sigui promove deporte.

SV Bubali ta hopi popular den e area di futbol tanto di hende muher, hende homber y mucha.

Banda di esaki, e organisacion ta desea di sigui promove otro deportenan tambe y den futuro hasta yega na un posibel Sport Complex.

Di e forma aki lo por sigui stimula un y tur pa sigui practica deporte.

Minister Paul Croes tin un aprecio special p’e bario di Noord pa cual e proyecto aki ta uno cu a capta su atencion di inmediato.

E Minister ta convenci cu esaki ta un bon proyecto, lo yuda na engrandece tanto e club, pero tambe e deporte y mas ainda lo sigui uni e bario di Noord pa sigui haci cosnan positivo.

E miembronan di comision ta entusiasma cu e apoyo di Minister Croes y ta contento cu pronto SV Bubali y e bario di Noord lo por conta cu nan propio Mini Soccer Field. Ya caba a cuminsa traha duro rib’e proyecto y ta spera cu pronto lo por cuminsa mira e prome desaroyonan pa cu e realisacion di e proyecto.

Top