Synchro Aruba tremendo representa na 2017 US National Synchronized Swimming Championships

 

Recientemente na Tucson, ARIZONA e Campeonato Nacional di Merca a tuma lugar di Landamento Sincronisa. Aruba tabata representa pa dos atleta, Abigail de Veer y Neftaly Albertsz. Y tambe Aruba tabatin mas representacion den e persona di Kyra Hoevertsz, cu tabata hunto cu su ekipo di Lindenwood University.

 

Abigail de Veer tabata e prome atleta di Aruba cu mester a competi den e categoria JUNIOR, locual ta e edad di 15-18 aña, y a participa den e evento di FIGURA y SOLO. Tabatin 133 participante, mayoria di Merca mes, pero tambe tabatin atletanan di Puerto Rico y Brasil. Abigail a termina na di 56 puesto.

Despues Abigail mester a particpa den e evento di Solo, na unda tabatin 30 Solista y Abigail a termina na di 16 puesto. Mirando e nivel di e competencia mester bisa cu esaki tabata un tremendo resultado pa Abigail.

 

Despues a toca e categoria SENIOR na unda Abigail y Neftaly a participa como Duet. Den e categoria aki tin dos rutina, cu combina ta determina e posicion final, esta e TECHNICAL y e FREE rutina. Ambos ta cu musica pero e diferencia ta cu e TECHNICAL tin cierto elementonan aden cu tur atleta mester hasi y den un secuencia stipula.

Den e mesun categoria Kyra tambe a participa cu su partner di Lindenwood University. Despues di e prome evento Lindenwood University a keda na di prome lugar cu Kyra y Allyson Haylor y Aruba su Duet a keda na di 6 lugar cu Abigail y Neftaly di un total di 19 rutina.

 

E dia sigiente tabatin e evento di Duet Free, y akinan e Duet di Aruba a landa nan mihor landa y a sali na di 6 lugar overall cu un puntuacion total di 132.9062. Pero toch Aruba a logra di triunfa ariba e podium di medaya den forma di Kyra cu hunto cu su Duet partner a logra conkista e medaya di Ora cu un puntuacion total di 149.6618.

Pa e delegacion di Aruba e competencia a termina cu e ultimo evento di Duet, pero Kyra mester a landa e evento di Team ainda cu Lindenwood University. Aki nan tambe Kyra a logra gana e medaya di Ora, y asina bira double champion di US NATIONALS pa e aña 2017 den e deporte di Landamento Sincronisa.

 

Mester bisa cu nos di Barracudas Aruba y AZB ta sumamente orguyoso di nos atletanan cu ta haciendo un bon papel den exterior. Ta asina tambe cu apenas desde augustus 2016 Kyra a join Lindenwood na unda a cuminsa su prome aña di estudio como “freshman”. Desde e tempo ey a incorpora den e ekipo di Lindenwood cu tin como head-coach Lori Eaton y coach assistent Mikayla Francees y Irene Montruccio.

Lori Eaton ya tin añas ta yuda coach e ekipo di Aruba cu hopi bon resultadonan, e. o. ultimo e medaya di Brons na CAC, Veracruz.

 

Pa wak mas potret y pa sigui mas informacion tocante Landamento Sincronisa por subi riba e pagina di Facebook di Barracudas Aruba y riba Instagram synchro_aruba.

Tambe desde e luna aki e WEBPAGE di Barracudas ta online! Pa bishita esaki bay na: barracudasaruba.com!

Top