Ta awor mester di gobernantenan macho: Hulanda lo saca e stèker financiero fo’i stopcontact

WILLEMSTAD – Tur cos ta indicá cu nos gobernantenan actual y futuro gobernantenan mester tin nan carson bon fahá y pará cu dos pia riba tera pa nos por sobrepasá e periodo di gobernacion cu nos t’aden y e futuro periodonan di gobernacion.

Esey ta pa varios motibo, pero principalmente pa motibo cu posiblemente e aña aki te ultimo aña cu Hulanda ta pone fondo disponibel pa tur sorto di proyecto cu Corsou ta entamá y cu ta drenta via di e canalnan cu Hulanda a crea pa canalisá placa pa desaroyo.

 

Pa cuminsa, mester waya un biento mas democratico den e relacion entre e partinan di Reino Hulandes.

Pero mas democracia ta nificá tambe mas responsabilidad y si tira bista atras sigur e ultimo 6 añanan, e responsabilidad aki tabata simplemente un rataplan.

Tanto coalicion di Gobierno den tanto aña y un instabilidad di otro mundo cu a pone cu economia di Corsou ta den un pos profundo y situacion social den casnan di famia ta cos di grita.

 

Un di e fundeshinan di bon situacion economico y social ta enseñansa, pero sindicato di enseñansa tin laga nos yam’é, e machete di Damocles, ta cologá riba cabes di Gobierno, pasobra Enseñansa tabata e yiu di afó di tur e Gobièrnonan cu a sinta for di 10-10-10.

Politiconan na Corsou y Sint Maarten ta pidiendo pa cambia Leynan di Consenso y nan kier tin mas di bisa den nos mes paisnan.

 

Tantu Aruba como Corsou kier un Reino mas activo y mas consistente caminda tur pais ta sinti cu nan ta forma parti di Reino y no parti di e orkesta cu Hulanda como dirigente.

Si para un rato y pone tur cos den contexto, e desigualdad entre paisnan di Reino lo crece y esey ta inaceptabel. Specialmente pe pueblonan y nan derecho di tin oportunidad igual.

Manera e situacion ta awor’aki claramente no tin derecho igual.

 

Por ehèmpel e Boneriano no tin mes derecho cu un macamba y ni mes tanto cu un Curasoleño.

E falta di igualdad aki ta manera un bòm bou di trono di Reino.

Pa Reino florecé na lugar di keda stancá, mester inverti den desaroyo social, den enseñansa, den cultura, den crea cupo di trabou y salubridad. No un aña so, pero pa hopi aña benidero.

 

Den e contexto aki tabata interesante pa tende un miembro di Cas Real Hulandes recomendá politiconan pa siña mas di mucha, pasobra nan ta mas creativo ora nan asercá un proyecto.

Nan no ta pegá den tradicion y nan ta mira cos diferente.

Talbes ta for di wowo di un mucha politiconan mester mira con Reino tin cu funcioná.

E gòlpi duro mes a bin ora cu a anunciá cu e paisnan autónomo den Reino mester hala faha mara pasobra e cranchi di placa ta bay sera.

 

Y peór ainda, e placa cu a inverti den cantidad di proyecto no a duna e resultado deseá specialmente riba tereno di seguridad personal y combati criminalidad.

Esey a sali na cla ora cu Controlaria Hulandes a midi kico tanto placa a producí y e resultado tabata decepcionante.

Pero awor t’e paisnan autónomo mes tin cu pone e placa riba mesa, pasobra esey tabata e palabracion.

Specialmente riba tereno di e cadena hudicial caminda Aruba tin un bentaha riba e otro islanan, pasobra nan cadena hudicial ta funcioná mihor cu na Corsou.

Un ehèmpel ta cu prizon na Corsou y Sint Maarten ta un rotzooi apesar di tanto placa cu a inverti den nan.

En cambio maneho di Cuerpo Policial na Sint Maarten a drecha, pero na Corsou e ta malamente bruhá.

Top