Ta confirma un maneho financiero stabiel

Durante e reunion di dia 2 di februari 2017 e Comite di Maneho Monetario (CMM) di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11 porciento y e “advance rate” na 1 porciento, despues di a evalua e datonan economico y monetario mas recien.

A considera e siguiente informacion y analisis den e proceso pa yega n’e decision aki.

 

RESERVANAN INTERNACIONAL

E reservanan internacional di divisa (incluyendo diferencianan den revaluacion di oro y di reservanan internacional) y e reservanan oficial a mantene nivelnan adecua na fin di december 2016.

Ambos a registra aumentonan di, respectivamente, Afl. 281,5 miyon (+17,5 porciento) y Afl. 193,3 miyon (+13,1 porciento), compara cu december 2015.

Consecuentemente, e reservanan internacional y e reservanan oficial a yega, respectivamente, na Afl. 1.892,4 miyon y Afl. 1.689,9 miyon na fin di december 2016.

 

DESAROYONAN DEN CREDITO

E total di credito di e banconan comercial a mustra un aumento (+2,5 porciento) na final di december 2016 compara cu december 2015.

Credito na empresa y fiansa pa construccion di cas a aumenta cu 1,2 porciento y 4,6 porciento, respectivamente, mientras cu credito na consumidor a baha cu 4,8 porciento.

 

INFLACION

Na december 2016 a registra deflacion den e prijsnan compara cu e aña anterior (−0,3 porciento) como tambe den e promedio anual di inflacion (−0,9 porciento).

E ultimo ta principalmente causa pa prijsnan mas abou di gasolin y un bahada den e tarifa di coriente na januari 2016.

E promedio di inflacion ora exclui e componentenan di cuminda y energia a yega na 0,5 porciento, primordialmente reflehando un aumento den e componente di vivienda di e Indice di Prijs di Consumo.

 

TURISMO

Durante 2016, indicadornan di turismo a mustra señalnan di debilidad, como cu a nota caidanan den e cantidad di anochinan permaneci na Aruba (−4,3 porciento), ingresonan turistico registra na banconan comercial (−3,2 porciento) y e cantidad di bishitantenan (−10,0 porciento), compara cu 2015.

Un excepcion n’e desaroyonan negativo aki ta un subida registra den e cantidad di turistanan crucero (+8,1 porciento).

 

PLACA DEN CIRCULACION

Na december 2016 e cantidad di placa den circulacion a subi cu Afl. 93,0 miyon te na Afl. 4.166,4 miyon, compara cu e luna anterior. Esaki a resulta for di un aumento den e activo domestico neto (+Afl. 102,4 miyon), parcialmente mitiga pa un caida den e reserva di divisa neto (+Afl. 9,4 miyon).

Mientras cu e subida den e activo domestico neto a resulta dor di tanto e credito domestico (Afl. 98,1 miyon) como transaccionnan no relata na credito (+Afl. 4,3 miyon), e caida den e reserva di divisa neto di e sector bancario tabata di un banda debi n’e benta neto di divisa di Afl. 213,7 miyon na publico.

Esaki tabata primordialmente en coneccion cu pagonan neto p’e importacion di bienes, inversion di portfolio, otro servicionan y otro inversionnan.

Di otro banda, e benta neto aki a wordo mitiga p’e compra neto di divisa di Afl. 204,3 miyon for di publico, principalmente asocia cu turismo, transaccionnan riba e cuenta di capital y transfarencia neto for di cuentanan den exterior di companianan local.

 

MERCADO FINANCIERO

Na december 2016 a nota un aumento den e promedio di interes riba depositonan nobo (+0,4 punto di porcentahe te na 2,0 porciento), mientras cu un bahada a wordo registra den e promedio di interes riba prestamonan nobo (−1,0 punto di porcentahe te na 6,9 porciento), compara cu e luna anterior. Consecuentemente, e margen di e tasa di interes riba prestamonan nobo a cai cu 1,5 punto di porcentahe te na 4,8 porciento.

 

ADVANCE RATE

E determinantenan di e “advance rate” di BCA a keda stabil. E margen entre e “advance rate” di BCA y e “Federal Funds rate” tabata 0,46 punto di porcentahe na december 2016.

Consecuentemente, no tabatin razon pa cambia e “advance rate” di BCA.

Top