Ta considera esaki un atentado contra nos pilar economico Ta opinion di Otmar Oduber

“Ta bayendo un luna cu a retira e 3 comisarionan di ATA y ainda nan no a wordo re-emplasa. E compania no tin un hende na cabes pa loke t’e organo di supervision cu mester tin y peor t’e hecho cu ta trata nos pilar economico, nos turismo, riba cual nos ta depende riba 90% di dje”, Otmar Oduber di POR ta indica.

 

E ta bisa cu turismo ta practicamente unico entrada di pais Aruba y e forma con Gobierno y e Minister encarga ta actuando ta inaceptabel.

E forma di un persecusion cu a tuma lugar den e diferente empresanan aki a wordo haci na un forma ilegal pa loke ta trata specificamente ATA.

Pero tambe ora cu Gobierno ta aserca personanan responsabel, profesional, cu ta wordo pidi a base di nan conocemento y buena conducta den nos comunidad pa asumi e responsabilidad di un comisario di un empresa estatal di pais Aruba, ta un señal robes.

 

Ta papiando di hendenan cu cargonan sumamente halto den nos comunidad, personan respeta den nos comunidad cu lamentablemente a wordo trata na un forma inhumano y a wordo retira na un forma ilegal.

Esaki t’e motibo cu te ainda Gobierno no a nombra un board pa dirigi, supervisa y aproba e maneho di ATA, Otmar Oduber a indica.

 

Danki Dios a mira e prome dos lunanan sumamente positivo pa loke ta trata e industria hotelero, trabou di nos Arubianonan a aumenta tur dos luna, grado di ocupacion a aumenta cu casi 5% cada luna,

RevPar a aumenta cu casi 10% durante e dos lunanan aki, mescos cu prijs pa kamber. Mustrando cu e maneho cu tabata wordo hiba dor di e profesionalnan den e instituto di ATA y otronan den AHATA y stakeholders, ta continua den e direccion positivo pa loke ta trata economia di Aruba.

 

Den e ley cu ta goberna ATA ta poni na un forma hopi cla cu e Presidente di e board como tambe e miembronan cu ta wordo nomina pa AHATA, no por wordo retira sin mas dor di e Minister, si no ta prome cu scucha y haya un conseho di e propio board aki.

Den e caso aki a retira tur hende na un forma iresponsabel/ilegal.

Den e ley tambe ta poni cu Gobierno mester splica y duna un motibo pa cual ta retira e miembronan.
Sr. Oduber ta splica pakico iresponsabel: Pasobra n’e momentonan aki, decisionnan cu mester wordo tuma a base semanal dor di e board ta keda para.

Esaki ta base di e ley cu a wordo aproba den Parlamento mes cu por imposibilita y trece e industria principal di nos turismo na peliger, si no tuma decisionnan.

Esaki lo tin efecto aki 5 pa 6 luna pa p.e. pa proposicionnan cu mester wordo haci den exterior y convencionnan cu mester wordo organisa entre otro.

Ta exigi p’e situacion aki wordo remedia mas liher cu ta posibel, pasobra na final, aki 6 luna, bo tin un Gobierno nobo y e Gobierno lo no tey pa responsabilisa actonan cu ta tuma lugar awe pero cu lo tin consecuencia despues di september.

 

Top