Ta crea Ministerio di Integridad

Na su salida for di Gobernador Alfonso Boekhoudt, Formador Evelyne Wever Croes a confirma cu e intencion di e proximo Gobierno ta pa crea un Ministerio di Integridad.

Den tur e preguntanan cu a wordo haci na e lider di MEP y Formador Evelyn Wever Croes, un di nan cu e por a contesta afirmativamente ta e deseo pa crea un Ministerio di Integridad, cu lo bay cay bou di e cartera di Asuntonan General.

“Mirando cu integridad pa nos ta asina importante, cu ta e linea cora di henter nos campaña, e transparencia y Bon Gobernacion cu nos kier logram a dicidi di eleva esaki creando un Ministerio specificamente pa atende cu e tema aki.” E Ministerio aki ta bay percura pa crea conscientisacion den henter e aparato Gubernamental di kico ta integridad. MEP ta kere cu ta importante pa tur hende sa kico ta integridad y trece control den e aparato Gubernamental. Kier demostra cu ta cuminsa cerca e Gabinete mes prome y pa despues poco-poco e balornan di integridad den Gobernacion.

E Ministerio aki tambe tin un tarea hopi importante cu mester bay prepara e Camber di Integridad cu Aruba ta bay crea. Esaki ta un instancia cu por wordo compara cu CAFT, cu ta haci e controlnan riba tereno financiero, y Camber di Integridad ta un departamento los di Gobierno cu ta bay controla Gobierno riba e tema di Integridad. El a duna ehempel cu ora mester cera un contracto pa renobacion of ampliacion di un instituto manera hospital, esaki mester pasa den man di Camber di Integridad prome cu Gobierno tuma un decision riba dje. Di e forma aki tur hende sa cu un instituto independiente cu sa di e tema a evalua e aspectonan di Integridad den e contracto pa evita e impresion eroneo cu tin cosnan cu a bay robez, manera ta e caso den e proyecto di Hospital.

El a bisa tambe cu si no bini cu e Camber di Integridad, Hulanda lo impone esaki via di un KB “y esaki ta algo cu nos no kier”. Den pasado na diferente ocasion Hulanda a pidi pa Aruba mes bini cu un Begrotings Kamer, un sistema pa controla e presupuesto riba su aspectonan financiero. Door cu no a haci esaki, e bini e CAFT. “Pa evita cu nan ta bin haci esaki via di un KB, nos mes ta bay crea e instancia aki,” sra. Evelyne Weve Croes a expresa. Aunke cu Aruba mes ta bay crea esaki, lo mira e modelo di Sint Maarten como ehempel pa mira kico ta loke Hulanda ta desea. No por bay crea algo cu nan lo no respeta y duna nan motibo pa nan mes crea un instancia asina.

Ministerio di Integridad ta pa evita cu Minister y ambtenaarnan ta yuda un persona cu e conoce, of un familiar, mas lihe cu e ciudadano comun y coriente. Pa logra esaki, mester conscientisa henter e aparato gubernamental riba e tema aki.

 

 

Leave a Reply

Top