Ta hopi trabou ta spera Gobierno nobo pa drecha situacion financiero di Aruba

Fraccion di MEP a reuni cu IMF siman pasa, y awor e conclusionnan preliminar di nan estudio a sali publica den prensa local. E conclusionnan aki ta refleha e preocupacion serio cu IMF tin pa cu e situacion financiero y economico na Aruba.

Aruba no a conoce crecemento economico, ni tampoco riba tereno di turismo. Y esaki den relacion cu e MEGA DEBE cu Gobierno di AVP a hinca nos pais aden, ta haci e preocupacion mucho mas grandi.

 

Esaki a keda expresa durante e reunion cu lider di MEP Evelyn Wever-Croes y coleganan Ady Thijsen y Guillfred Besaril a hiba cu delegacion di IMF siman pasa na Banco Central. Y t’e linea cora den e conclusionnan preliminar publica den prensa local.

IMF a expresa su preocupcion riba crecemento economico di Aruba. Economia di Aruba tabata y ta sigi hopi swak, no tin mucho crecemento.

E unico speransa t’e refineria, maske no tin informacion concreto ki dia por spera e re-apertura.

 

E preocupacion pa cu e debe di pais Aruba, ta hopi grandi, pasobra un debe halto asina tin un impacto negativo riba crecemento economico.

IMF a indica cu 84 pa 85% di debe manera Aruba a conoce ta alarmante y a indica cu Gobierno mester pone mas esfuerzo pa baha esaki.

IMF ta comparti e preocupacion di fraccion di MEP cu Gobierno no a tuma medidanan structural pa soluciona e problemanan financiero di pais Aruba.

Tambe IMF ta preocupa con e tantisimo PPP nan lo influencia e posicion di debe di Gobierno.

 

Riba turismo tambe IMF a indica cu Aruba su resultadonan riba turismo ta mucho mas MALO cu otro destinacionnan similar. IMF a keda preocupa cu esaki.

IMF lo traha su raport unabes nan keda cla cu tur analisis y lo publica esaki. Un cos ta sigur, e situacion no t’asina bunita manera Gobierno ta pretende.

 

Y ta hopi trabou ta spera e Gobierno nobo pa drecha e situacion financiero di pais Aruba. Un cos si ta sigur, e Gobierno actual no a logra drecha tur locual nan a daña den finansa publico.

Cu Gobierno di Mike Eman a redobla e debe di pais Aruba, tur hende sa. Cu Gobierno di Mike Eman a faya, tur hende sa.

Y cu Gobierno di Mike Eman no por soluciona e problema serio di e MEGA DEBE, tambe tur hende sa.

 

“Pues awor ta den bo man, si realmente bo kier pa finansa publico di Aruba wordo mehora, ban hunto p’e cambio, sin miedo.

E cambio cu nos di MEP ta ofrece ta poniendo e ser humano central. Corta gastonan di luho di e Ministernan prome, y no mishi cu pueblo.

Pueblo a sacrifica suficiente caba durante e 7 añanan aki, awor ta momento p’e Ministernan hala faha mara”, lider di MEP Evelyn Wever-Croes a duna di conoce.

Top