Ta parce cu no menos 14.000 liter di diesel a bay perdi na hospital den derame inexplicabel

Diabierna mainta tempran a surgi un situacion di emergencia na dr. Horacio Oduber Hospital, pero cu autoridadnan competente di dicho instituto a bisa cu pa den oranan di atardi esaki a normalisa.

Mainta tempran pashent y empleadonan di hospital tabata keha di un holo fuerte di combustibel y na mesun momento tabata sinti iritacion na cuero y wowonan. Mesora a cuminsa haci investigacion y rapidamente a detecta cu e holo aki ta bini di Generator Room, unda a constata un “overflow” di fuel.

Den algun ora a bisa cu e problema aki a wordo controla, pero loke no tabata sa na e momentonan ey ainda ta cu e combustibel aparentemente a pasa pa e sistema di “sewage” of a bypass esaki pa yega Bubali Plas. E prome cu a comenta esaki tabata e ambientalista Greg Peterson, kende a pone riba su cuenta di Facebook, bisando: What a disaster at Horacio Oduber Hospital. 14.000 liters of diesel via sewage system to Bubali… How is this possible?. Un di esnan cu a reaccion riba e forma pa limita e daño tabata Bibi Arends. Ayera por a lesa den oranan di atardi un comentario cu a wordo poni door di Bibi Arends, kende un tempo tabata presidi e Comision di Calidad. El a bisa: “Si Aruba tin 1 trained & basically equiped local (p.e. Di APA) oilspill response team: cu un paar di boom, e spill por a wordo contene y despues saca cu vacuum trucks di e awa. Pero mirando cu no tin un swift action y solo ta bahando, mi ta teme pa lo pio.”

E reaccionnan riba e post di Greg Peterson tambe tabata varia, pasobra tin hende ta bisa cu e mancha no ta parce diesel y ta parce un combustibel bieu. Sinembargo ningun autoridad a reacciona riba e ponencia aki ni hospital.

Pa loke ta e situacion di hospital, asina cu alarma a wordo bati, Polisnan y Brandweer a yega na e sitio y tambe personanan cu ta forma parti di e Comision di Calamidad. A evacua pashentnan, inclusive esnan di ICU.

E area caminda e spill a tuma luga ta na e parti nobo y tabata papia cu e cantidad di diesel cu a palma tabata 14.000 liter.

E situacion a causa cu den oranan di merdia e pashentnan no por a ricibi bishita pero pa anochi esaki a normalisa.

E problema mes a wordo contene, pero ta investigando kico a causa e spill aki y “tur esnan responsabel mester asumi nan responsabilidad,” Ezzerd Cilie, director di Hospital a duna di conoce.

 

Leave a Reply

Top