Ta spera cu iniciativa exitoso di Minister Michelle Hooyboer-Winklaar lo continua den futuro

Ora un iniciativa ta exitoso, ta surpasa cada aña tur expectativa y ta bira practicamente un tradicion pa un grupo grandi di persona den nos comunidad, pero e persona cu ta organis’e y ta sostene 100% ta dicidi di haci un cambio grandi den su carera, ta di spera cu e iniciativa aki tog conoce continuidad.

Esaki tabata e remarca cu mayoria participante n’e conferencianan anual pa Dia di Hende Muher a expresa di un forma of otro na momento cu Minister di Enseñansa y Famia y den pasado Minister di Asunto Economico y Asunto Social, esta Michelle Hooyboer-Winklaar a anuncia cu e ta caba su termino como mandatario y e aña aki ta tuma despedida di politica.

 

E conferencia pa Dia di Hende Muher a cuminsa como un evento pa trece hende muhernan den nos comunidad hunto cu un cantidad di meta hopi amplio, pero basicamente pa celebra e ser humano muher di tur edad y den tur su facetanan.

Entre e metanan ta pa comparti tocante di topico y temanan di interes general y comun pa hende muhernan rond mundo, pa crea conscientisacion p’e importancia di e papel cu e hende muher ta hunga den cualkier comunidad, y pa crea relacion y sistemanan di apoyo entre e hende muhernan na Aruba.

 

Lisenny Croes tabata entre e 800 personanan cu a participa n’e conferencia e aña aki. Tabata su prome conferencia di hende muher y el a atende hunto cu su rumannan.

Lisenny Croes ta un ama di cas cu un trabao part-time na Blue FM, unda cu e ta traha tur mainta for di 6:30am pa 9:00am.

El a splica cu prome e tabata duda un poco, como cu e no ta custumbra cu eventonan manera e conferencia aki, pero el a invita su rumannan y hunto nan tabata disfrutando di e mainta.

Lisenny Croes ta agrega cu e presentacion di Minister Michelle Hooyboer-Winklaar tabata hopi bunita, como cu el a presenta con damanan por ta politico y mester wordo respeta den comunidad, pero tambe e parti cu e respet pa hende muher como ser humano y cu e hende muher tin asina tanto pa ofrece den comunidad a resalta pe.

 

Un otro orador cu a capta Lisenny Croes su atencion y a impresion’e hopi tabata Murielle Brown-Roos. E ta considera e conferencia aki uno espectacular y loke sigur e ta hiba cune for di e conferencia ta cu hende muher por sobresali den tur decision cu nan tuma.

 

 

Leave a Reply

Top