Ta temporada di Shimaruco

Ken no ta corda nan infancia canando den mondi y piki poco Shimaruco.
Hopi ta corda esaki como nan fruta di infancia. Den dado caso mayoria biaha nan ta come berde mes. Imaginabo ora cu e ta ful cora y bon “hecho”nan tabata plunder ful e mata. Sigur antes tabatin hopi di e matanan di Shimaruco planta den cunuco.

Awendia esaki no t’asina popular mas. Pabo por haya un mata di Shimaruco den mondi ta hopi dificil. Varios di nos mondinan aki a wordo destina pa contrui vivienda.

Un mata di Shimaruco no ta un mata cu ta crece mucho grandi. Nan ta matanan cu ta keda relativamente cortico y tin biaha nan ta yega te cu 2 pa 3 mester di haltura.
Un mata cu ta originalmente for di Yucatan, Mexico. E fruta ta cora manera rondo.
Ta contene hopi vitamina C y antioxidante. Tin biaha poco zuur te cu hopi zuur. Despues di yobida e ta un di e matanan cu masha liher mes ta haya fruta.

Manera semper cu tin matanan di Shimaruco den vecindario y cu nan ta cuminsa floria y duna fruta bo ta cuminsa haya molester di “lembelembe” cu ta hopi fastioso. Tin biaha esaki ta bay te den auto y bo ta miranan n’e glasnan parti paden.
Cabrito tambe ta gsuta come e mata aki. Un mata cu ta wanta hopi secura.
Durante di e periodo aki tambe e mata ta keda sin blachi. E ta mustra manera seco y tin ora manera morto, pero na momento cu poco awa yobe mesora e ta cuminda haya flor. Su flornan ta chikto di color roos pa cu tin biaha ta mustra manera color biña.

E fruta mes ta for di comienso berde chikito y segun cu eta crece e color ta cambia bira cora y cla pa come. Cabrito tambe ta gusta e mata aki hopi pa na para y come.

Na Aruba ainda nan ta traha dushi di Shimaruco. Esaki nan ta wordo traha cu suco y algun otro ingredient y e ta keda masha autentico di Aruba.
Recientemente sr. Vicente Kock tambe ta traha biña di Shimaruco di Aruba.
Tin biaha e ta conbina esaki cu Casho y asina traha e Biña di e dos combinacionan aki. Algo masha particular cu sr. Vicente Kock ta produci. Turistanan cu ta bishite ta keda masha encanta di saboria un bon Biña traha localmente.

E mata di Shimaruco ta obtenibel aki na Santa Rosa. Si bo ta desea di tin un mata asina den bo hofi pasa busca esun dibo.

Leave a Reply

Top