Tabata un momento historico pa tur nurse, paciente y Aruba – A muda e prome paciente p’e New Bed Tower di Hospital

E dia tan spera a yega na unda Dr. Horacio E. Oduber Hospital a traspasa e prome paciente p’e New Bed Tower. E momento aki tabata uno importante y emocionante pa tanto miembro di personal  di Hospital como e pacientenan mes.

Sumamente emocionante tabata momento cu a traspasa e prome paciente, sra. Janine Koolman di Hospital su edificio existente p’e New Bed Tower. Sra. Koolman ta bay den historia como e prome paciente cu ta ser ingresa den nos New Bed Tower.

 

Ayera mainta sra. Ruthmila- Odor- Croes a drenta Hospital como Zorgmanager di Niet Snijdend 3 y awor e por bisa cu e ta Zorgmanager di B3. El a indica cu e preparacion a cuminsa ya hopi luna atras, unda a cuminsa “brainstorm” y pone riba papel con ta bay organisa e traspaso.

Den fin di siman a cuminsa prepara e camanan, y loke no mester lubida ta cu e parti di duna cuido, pues e parti operacional tambe mester a continua.

Esaki a pone cu e mesun hendenan tabata haci nan trabou y despues tabata yuda cu e preparacionnan necesario pa muda den e edificio nobo, pasobra tur cos mester ta safe p’e pacientnan.

 

Diamars mainta tabatin hopi preparacion p’asina caba cu e ultimo detayenan pa na final nan haya e “green light” pa muda e prome paciente. Si para keto n’e cambionan di mas grandi cu di biaha lo ta visibel p’e paciente na momento di bay di e Hospital existente p’e New Bed Tower t’e “look” mas moderno y refrescante.

Siguramente e kambernan di 1 of 2 persona cu hopi mas iluminacion y hopi mas trankil. Awor pacientenan tin cama electronico na unda nan mes por controla e cama.

Pacientenan cu ta drenta cu rolstoel tin awor un lift automatico cu ta hisa nan y pone nan riba cama. Por imagina cu esaki siguramente lo alivia e lomba di nos enfermeronan.

 

E prome paciente cu a drenta den e New Bed Tower tabata sra. Janine Koolman. El a ser transporta pa un team di Hospital conhuntamente cu Minister dr. Alex Schwengle.  Na monento cu e lift a habri n’e New Bed Tower sra. Koolman a wordo ricibi pa sr. Ezzard Cilié di Hunta Directiva di HOH hunto cu algun miembro di e Comision di Construccion.

El a duna di conoce cu pa su persona tabata un sorpresa ora cu un nurse a bis’e cu nan tur a scoge p’e t’e prome paciente pa drenta den e New Bed Tower.

E tabata contento pa biba e momento aki cu e a comparti cu su yiu.

 

“Ora cu mi tabata saliendo den rolstoel di e Hospital existente p’e Hospital nobo y a mira e cambio, mi por a sinti cu bo ta den ful un otro mundo”, segun sra. Koolman. El a keda bon ricibi door di tur miembro di personal di departamento B3 y a gradici Minister Schwengle pa a trece den e New Bed Tower.

 

E cambio aki ta pone cu sigur cu awor tin un Hospital mas espacioso, mas bunita y hopi mas moderno.

Pabien na ful e team cu a traha duro pa haci e traspaso di tur paciente riba e dia aki uno exitoso y mas cu claro safe. Sin boso esfuerso esaki sigur no lo tabata posibel.

 

 

Leave a Reply

Top