Taekwondista Chiara Petrocchi a percura pa Aruba logra su prome medaya di Oro den Weganan Sur Americano Hubenil Santiago 2017 na Chile

Diasabra atardi tabata e ultimo speransa pa Aruba logra un medaya mas na Chile ora cu e atleta di taekwondo Chiara Petrocchi a mira accion den e Polydeporte den e Compleho Olimpico Chileno.
Mester bisa cu apoya pa henter e delegacion di Aruba, e atleta Petrocchi a bringa su prome combate contra di Peru cual Chiara Petrocchi a gana convincente cu score abulta. Sinembargo e speransa pa logra Oro a bin despues cu Chiara a gana den e combate semi final contra di Uruguay unda Chiara Petrocchi ta aplasta su contrincante cu e score di 31 – 10.

Mas cu claro e nervionan tabata super halto ora Chiara mester a enfrenta e fuerte contrincante di Brazil.
Den e combate final e prome rond a bay 1 – 1, pero den e di dos rond e pugil Arubano a demostra confiansa y ta bay dilanti pa 9 punto.
Den e di tres rond ya caba e medaya di Oro tabata un hecho, nada no por a bay robez mas. Mas cu claro e delegacion di Aruba a celebra esaki na grandi cu grito y aplauso.

Momento di orguyo ora nos tono glorioso Aruba Dushi Tera a zona den e Polydeporte yena cu fanatico cu a admira y aplaudi e bunita logro di Aruba.
Manera un periodista Brasilero a comenta; “Di unda boso a saca e rumannan Petrocchi aki? Nan ta di otro mundo”, referiendo na Sophia y Chiara Petrocchi. Ambos atleta a enfrenta un atleta Brasilero den final na Chile.
Pabien Chiara. Aruba ta orguyoso dibo

Top