Tanto Cuenta ta presenta dos di su artistanan pa e presentacion di 2 di juni

Manera a publica den un edicion anterior, Fundacion Bon Nochi Drumi Dushi den colaboracion cu Tanto Cuenta y bou auspicio di UNOCA, lo presenta diabierna 2 di juni na Cas di Cultura tres obra di ada desaroya y adapta na e cultura local, bou di guia di Desiree Correa.

Tin un total di 15 artista ta forma parti di e elenco cu lo presenta e tres obranan nobo di ada.

E grupo fantastico y dinamico aki di e elenco tin varios siman ta entrena tur diadomingo y den luna di mei a cuminsa entrena mas frecuente asta.

Despues di a haya guia continuo y tips tocante nan presentacion, tanto individual como den grupo, Tanto Cuenta kier presenta na boso como lectornan e prome dos artistanan cu lo actua den un un of mas obra durante e anochi di magia y fantasia.

 

E prome artista cu ta forma parti di e elenco nobo ta Brian Croes. E no ta un persona desconoci den e mundo farandulero. El a yega di participa pa Prins y Pancho di Aruba su Carnaval, pues e tin conocemento di actua dilanti publico grandi.

Den Cas di Cultura, Brian lo haci e trabou di narado di storia. Tabata Desiree Correa cu a descubri e talento scondi aki di Brian. E ta desplega su rol cu gusto ya cu e tin e personahe cu conoce e desaroyo total di e acontecimentonan den e storia. Brian su reto den su prome sali como narado ta di domina nervio riba escenario.

 

Di dos artista cu tambe a join e elenco di Tanto Cuenta ta Rachel Kraaijvanger.

Rachel no ta desconoci den e mundo di teatro. El a yega di participa den varios comedia.

Su ultimo presentacion tabata di un mucha muhe humilde yama Dorita den e obra ‘E amor di Dorita’. For di chikito Rachel tabata tin relacion cu storia, pa motibo cu na su cas nunca tabata falta un buki pa lesa. Pa su famia lesamento ta parti di educacion.

Lesamento ta habri bo conocemento y ta laga bo cera conoci cu un otro mundo. Su yiu gusta ora e ta cont’e storia.
Den e obra di Drumi Dushi Rachel lo desplega e rol di un hada madrina y den e obra di Shinishi Sushi e lo actua pa e madrastra di Shinishi Sushi. Su papel como e hada madrina Rachel ta haya mas dificil ya cu un hada madrina tin un caracter mas tierno di un persona perfecto, mientras cu e rol di e madrastra ta esun cu Rachel gusta, pasobra p’e un rol di un hende malo bo ta actua miho.

E actornan ta trahando duro pa por duna un presentacion magico dia 2 di juni venidero.

 

Fundacion Bon Nochi Drumi Dushi ta recorda tur amante di cuentanan di hada pa no lubida di cumpra bo carchi na Van Dorp, Dyon Party Center y Botica Paradera pa 15 florin.
Un funcion so tin y esey lo ta dia 2 di juni, di 6:30pm pa 8:30pm na Cas di Cultura.

Leave a Reply

Top