Team “Snor” a garna “Red Stone”!

Den weekend ultimo, e fabuloso Kudawecha Square Garden situa den 99 Bar & Restaurant tabata scenario di e tremendo clash entre dos team cu tin rivalidad total!

Team “Snor”, bou guia di “Snor” Perez, pa basta tempo caba tin un “appeltje” pa pela cu e team duro di Ayo, esta Red Stone. Wel, e biaha aki aparentemente Snor a fia un “grinder” y a bin ta garna Red Stone na grijs di 5 florin pa yarda.

 

99 Bar & Restaurant na Kudawecha no tabatin lugar mas pa pone hende di e tantisimo fanaticada cu a bin presencia e challenge aki. Den prome tanda Team Snor ta sali durisimo y ta yega halftime cu e score impresionante di 11 – 5, mandando un señal cla y raspa p’e trabuconan di Ayo cu e nochi ey no ta bay tin wega.

Snor claro mas cu contento cu e manera cu su team ta funcionando ultimo tempo. Ta parce cu tur e sacrificionan di studia strategia y tecnologia nobo con pa pasa e “boodschap” a cuminsa duna fruta.

 

Den di dos buelta Team Red Stone a hisa speed un tiki so…di “velocidad cocolishi” pa “velocidad morocoy”, y asina ta piki 7 punto so pa yega 12 net prome cu Team Snor pasa liña final cu 21 punto. Un palisa Team Snor ta duna Red Stone cu score impresionante di 21 – 12!! Style di score palindromo nan’ki. Testigonan a declara con un caravana di cara tristo y cu lagrima na wowo a sali despues rumbo pa Ayo, mientras cu den e scuridad di madruga por a wak cla cla e 4 sapato blanco nan cu Team Snor a regala Red Stone ta lombra manera luz LED na pia di Red Stone.

 

Tin entendi si cu e cos aki no ta bay keda asina. Team Red Stone a declara cu “they will be back”. Mal rabia y cu mihor strategia cu Snor. Keda pendiente p’e revancha del siglo aki.

Propetario di 99 Bar & Restaurant, e Embahador di domino di China, kier a gradici Budweiser pa su tremendo patronisahe p’e anochi super ameno aki, y tambe kier a anuncia cu fin di e luna aki lo ta bay tin wega grandi den 99 Bar & Restaurant!

Wega grandi pero grandi mes lo ta bay tin diasabra 27 di mei ora cu e gigantenan, e Goliathnan di Team Caba Cos, enfrenta nada menos cu e Davidnan di Team 99, kendenan den ultimo encuentro a sa di traumatisa Team Caba Cos ganando nan cu score di wanta rosea di 21 – 20.

Un logro cu a pone capitan di Caba Cos su higra bira preto preto.

Team 99 lo por wanta e presion diasabra 27? Si Team 99 bolbe gana, capitan di Caba Cos lo bolbe nenga di sali riba potret??? Shonnan, no perde e bataya formal aki diasabra 27 di mei na 99 Bar & Restaurant!!

 

Top