Temporada di ponemento di webo di tortuga a cuminsa

Diabierna 17 di maart ultimo den oranan di mainta a tuma lugar e prome ponemento di webo di un tortuga riba Eagle Beach na altura di Amsterdam Manor Beach Resort, y pa casualidad e momento unico a ser capta riba video pa un trahador di e propiedad cu tabata presente n’e sitio. Esaki ta un momento hopi importante den e ciclo di nos naturalesa y nos kier a comparti esaki cu henter e comunidad di Aruba cu e proposito di yuda concientiza tocante e epoca aki; y di biaha resalta kico t’e codigo di conducta corecto pa cu e bunita criaturanan aki cu ta keda bolbe tur aña n’e caminda cu nan a nace.

 

Ta recomendabel p’e personanan no para dilanti di nan y no usa flashlight ni ningun otro sorto di lus cu por stroba e tortuganan.

Tortuganan ta timido y tin biaha ta bay sin pone e webonan pa via cu tin hopi hende rond di nan cu por crea interferencia.

Ora nan a traha na nido y a caba di pone nan webo, nan mes lo bay laman bek.

Si bo topa cu algun tortuga cu ta mustra confundi dor di e lusnan rond di dje, yama Aruba Turtle Hotline pa asistencia na number 592 9393 mesora.

 

Top