Tiroteo entre autoridad y un gang di 4 persona local, despues di un persecusion cu caba na Bushiri

Diasabra den oranan di madruga algo pasa di 3’or, un unidad di Recherche ta topa cu un pelea den Hotzone, riba parkeer plaats di The Village.

N’e mesun momento nan ta constata cu un di e personanan envolvi, lo ta den posesion di un arma di candela.

E persona aki a logra bandona e sitio den un Nissan Cube blanco, cual a sali cu velocidad halto bay direccion zuid, mesora e Recherchenan a pidi pa refuerso.

 

MANIOBRA Y MANDA AUTO RIBA POLIS

Na altura di luznan di trafico di Superfood, na prome instante el a para p’e luz cora tras di un auto, pero na momento cu el a ripara cu tin algun patruya yegando mas cerca di dje, el a sigui core y den su ansha el a maniobra cu su auto y a manda e auto riba e Polisnan.

 

PERSECUSION A START

El a sali bay direccion rotonde Sasaki, el a sigui y drenta Schotlandstraat, bay zuid, mientras tanto diferente unidad di Polis tanto uniforma y no uniforma tabata siguiende e auto aki.

Na altura di Banjolux nan a kita bay links, pues riba e caminda di tera patras di go kart, nan a sigui bay ‘riba

 

TIRONAN A CUMINSA CAY

Mas pariba riba e caminda di santo aki, ocupantenan di e Nissan Cube a cuminsa los tiro riba e Polisnan. Mesora autoridad no a duda y tambe a cuminsa los varios tiro bek riba e Nissan Cube.

Casi na final di e caminda e Polisnan ta logra para e auto y ta detene tur 4 persona den e auto, cu ta trata di tres homber y un muher

 

AMBULANCE TA WORDO PIDI CU URGENCIA

Ambulance a wordo pidi cu urgencia n’e sitio, pasobra tawata mustra cu un di e ocupantenan lo a ricibi un tiro, pero despues e sospechoso mes a bisa Polis cu e bala lo a rasca su curpa bay.

No ta conoci con serio e herida tabata, pero asina mes el a wordo transporta pa hospital.

 

Polis a transporta e otro sospechosonan pa Warda di Polis na Shaba, entre nan un dama cu tambe tabata den e auto hunto cu e otro 3 hombernan , riba un di e imagennan por mira ora Polis a hibe Warda di Shaba.

 

TUR ESNAN ENVOLVI TA PERSONAN LOCAL

Locual a pasa den oranan di madruga nos mester para keto un rato y realisa cu cos a cambia, cu nos cayanan no ta sigur mas y cu cualke persona di cualke edad, por ta den posesion di un arma di candela of den cualkier auto of cas por tin un arma di candela y un tiro cu sali for di e arma ey por tin consecuencianan fatal cune.

Tur 4 persona den e auto tabata hendenan local, e grupo aki a falta tur clase di respet pa autoridad, mirando cu nan a los varios tiro riba auto di polis.

Nan sa bon cu por tabatin un posibilidad cu den e tiramento aki un di e tironan ey por a alcansa un di e agentenan tambe y nan sa bon cu Polis lo los tiro bek riba nan cu tambe por tabatin consecuencianan fatal pa nan, imagina un cuidadano cu ta cana sin arma pa defende su curpa.

 

 

Leave a Reply

Top