Torneo “Zabataya” na La Roca un exito rotundo!

E conosido rumshop La Roca na Moko, e luga caminda abo no ta wak “nan”, pero “nan” si ta wak bo, a organisa riba Dia di Betico, un biaha mas su clasico torneo di bolas crioyo na honor y recuerdo di defunto sr. Hector Ruiz, na bida un gran baluarte, amigo y patrocinador di La Roca.

 

Ya pa 11’or tabatin rij di hende pa busca e famoso BBQ cortesia di Chef Irene, pa despues cuminsa line up na e “Balls Arena” den cunuco patras di La Roca.

Despues di un periodo di “re-organisacion”, sindicalistanan di La Roca a aproba e siguiente team nan: Team Nos ta 3, aka “Los Hermanos Coraje” consistiendo di Jeremy, Gamir, Bibi y The Rock; Team Kibra Cos, consistiendo di Mikel “Opname”, Frans Figaroa, Tico-A, y Andres “Believe in Me’; Team Caba Cos, consistiendo di Juni “KiloWatt”, Robby “Bo Tin Prueba?” Robles, Lupe “Transformer” y Archi “The Marine”; Team Super Bon, cua tabata consisti di Lucas, Lilienne, Dominico, y por ultimo Team Smus, kende nan a consisti di Smus, Erika, Ingrid y Ricardo.

 

Prome cu e bataya cuminsa por a nota cu diripiente a cay mane un silencio siniestro y por a sinti mane un “vroem-vroem” ta core rond caminda cu stem abou un boca tabata fluister otro locual a resulta di ta un “Breaking News”!

Fuentenan fidedigno a confirma sin duda algun cu den weekend cu a pasa e conocido Capo di tutti Capo, esta Don Chicho, a haya un sota den biljard di nada menos cu e conocido “Lord of the Tortugas” Dr. Phil! Un shock den mundo di biljard na Aruba!

Cu maximo urgensia mester a pasa Don Chicho den mashin di MRI pa haci un scan, ya cu despues di e derota e tabata keha cu e no tin rudia, ni heup, ni pols, ni lomba mas pa biljard!

Nos lo keda pendiente di resultado.

 

En todo caso, e bataya a cuminsa a toda makina riba cancha den cunucu di La Roca, mientras cu dilanti den e “cocktail lounge” varios “cocktail” exotico tabata bay laira!

Despues di un merdia yen di emocion, na final ta dos ekipo a keda enfrenta otro p’e gran final, esta Team Smus, y e Team di “Los Hermanos Coraje”, caminda por ultimo sensacionalmente Team Smus ta derota “Los Hermanos Coraje” p’asina logra bay cu e titulo di Campeon Zabataya 2017!

 

Gerente di La Roca, Roly “Enamoration” Ruiz kier a gradici tur su clientenan cu a pone e dia di Betico bira un happening exitoso y tambe kier a gradici The Pastechi House pa su sponsoring di e evento.

Top