Trabou a cuminsa pa drecha 1 kilometer di caminda na Sabana Basora

Dialuna mainta Prome Minister Mike Eman hunto cu su colega di Infrastructura Minister Benny Sevinger tabata na Sabana Basora pa presencia inicio di e trabounan pa drecha henter e caminda di rotonde di Pos Chiquito direccion di Sabana Basora.

“Minister Sevinger a priminti cu e trabounan lo cuminsa na inicio di maart, despues di temporada di Carnaval, y el a cumpli cu su promesa”, Prome Minister Eman a bisa.

 

Dialuna mainta a cuminsa kibra e caminda n’e bahada di Sabana Basora, pa cuminsa cu e trabou di reconstruccion di mas o menos un 1 kilometer di caminda cual a rekeri un inversion di 1.1 miyon florin.

Trabou ta wordo realisa p’e compania bon conoci den e sector aki, esta BIC Aruba NV.

 

Segun a wordo splica dor di tanto supervisor di BIC, David Britten, como Director di DOW, ing. Marlon Croes, e trabou aki tin un duracion di maximalmente 4 luna.

Ta bay usa un sistema unda cu den oranan di atardi, e automobilistanan por haci uzo di e caretera y den oranan di mainta e ta wordo sera bek.

Ademas, lo traha den fase, pa sera cierto parti y finalisa esaki p’e por wordo uza di biaha ora e ta cla.

 

Dor di e yobida intenso cu Aruba a keda confronta cune na final y inicio di aña, e awa cu ta core a causa hopi daño n’e ader aki cu ta conecta e trafico di pariba y pabou cu otro.

No solamente e caminda a wordo afecta, pero tambe e yobida a causa cu e parti na banda a wordo coba, causando daño na mas cu un auto.

 

“Porfin nos caminda ta bay wordo drecha”, tabata varios comentario cu por a lesa riba Facebook despues cu a informa e bario cu e trabounan ta bay start.

N’e ceremonia den oranan di mainta tambe tabata presente Parlamentarionan Desiree de Sousa-Croes y Clarisca Velasquez.

Ambos a expresa alegria y a felicita Minister Sevinger pa cumpli cu su promesa pa duna Sabana Basora un bunita caminda, no solamente p’e habitantenan, pero tambe pa otro automobilistanan cu ta uza e caminda aki pa yega Playa, Santa Cruz y Noord.

 

Nan a menciona na mesun momento e cambionan bunita den e bario di Pos Chiquito, danki n’e trabounan cu ta wordo realisa den cuadro di Green Corridor, y cu a inclui mehoracion di varios caminda chikito den e bario.

Ademas cu lo pone un fundeshi nobo p’e caminda, tambe e lo tin su banchi na banda y un poco extra di asfalt tambe pa ora di yobida e no coba e parti na banda.

 

 

Top