Trabounan di un renobacion completo lo cuminsa e siman aki na Biblioteca San Nicolas

Despues di un temporada largo di espera dia 3 di april 2017 lo cuminsa cu e trabounan di renobacion di Biblioteca San Nicolas.

Den combersacion cu e Directora sra. Astrid Britten di Biblioteca Nacional, Lorna C. Jansen-Varlack a haya e informacion cu porfin tur cos ta cla pa cuminsa cu e trabounan.

 

Un noticia hopi agrado mirando con largo e edificio aki tabata den un estado deplorabel y pa no papia di e falta pa studiantenan haci uzo di un biblioteca den bon estado.

E inversion di renobacion ta 1.6 miyon florin y e contratista t’e compania Van Kessel.

E trabounan di renobacion lo dura mas of menos un aña. Mientrastanto a muda un parti di e biblioteca p’e ex edificio di SINFA y un parti di dje ta warda den un container.

 

E edificio despues mester bira uno hopi moderno unda nos studiantenan por bin studia, busca informacion, subi internet y prepara nan tareanan y charlanan.

A tene cuenta cu nos hendenan di edad unda un lift lo wordo instala pa nos grandinan y nos hendenan cu limitacion.

Un biblioteca moderno y cu tecnologia adecua ta un necesidad grandi pa nos studiantenan y usuarionan di pariba di brug.

E proyecto aki ta cay bou di Ministerio di Minister Michelle Hooyboer-Winklaar.

Pueblo di pariba di brug por ripara cu diferente edificio na San Nicolas ta haya atencion di renobacion y mantencion.

 

E ta importante pa cada districto tin un biblioteca of un lugar unda nos studiantenan por bay studia y of busca informacion despues di scol.

Esaki sigur ta un di e metanan di e edificionan multi funcional (MFA) cu ta wordo traha den diferente districto.

E ta importante pa studiantenan tin diferente lugar unda nan por studia den tur trankilidad y haci uzo di tecnologia moderno pa engrandece nan conocemento.

Un aspecto hopi importante pa futuro t’esun di seguridad y mantencion chikito bon plania di edificio.

Nos tur ta den pleno espera p’e proyecto aki bin cla mas pronto posibel pa nos hendenan por haci uzo optimal di dje, segun Lorna C. Jansen-Varlack di AVP.

 

Top