Traficante di droga Arubiano tin cu paga Afl. 1.472.503,67 of bay 3 aña será

E ciudadano Arubiano L.M. (75), kende na aña 2006 a ser condená na 6 aña y 50 siman di prizon pa su participacion den un organisacion criminal cu tabata importá cocaina na Aruba pa manda Santo Domingo, definitivamente a pèrdè e bataya legal contra Husticia y mester paga e suma di casi 1.5 mion florin Arubano.

Husticia no ta bacilá p’e placa completo sino cu e homber mester paga e suma completo of bay será 3 aña más.

Esey ta culminacion di un caso cu a cuminsa na aña 2006 cu condena di e comerciante Arubiano, kende tabata financiá y facilitá negoshi di droga na Aruba.

 

E caso aki a cana 11 aña den pasiyonan di Corte di Husticia, pero awor ta definitivamente tras di lomba.

Apesar cu e homber ta oficialmente bancarota y nan a kita tur su casnan y tereno y hasta su auto for di dje, e tin cu paga e suma mionario.

Ministerio Publico a persigi e ciudadano aki manera pitbull p’e no disfrutá di e ganashi cu el a haci cu negoshi di droga.

 

Su abogadonan a bin cu argumento cu despues cu a pasa tanto tempo no ta husto pa ranca tanto placa for di e èx-convicto y tabatin hasta documentonan di Corte cu a pèrdè cu por a haci e demanda inaceptabel, pero Corte di Husticia Comun tabata implacabel.

Es más, Corte ta haña cu e por paga, pasobra ainda e ta capas di traha placa pa mantené su famia.

 

Aña pasá Corte na Aruba na dos ocasion a trata e peticion di e abogadonan pa anulá cobranza di e suma mionario.

E comerciante mes no a presentá sino a manda su abogado mr. Chris F.K.J. Lejuez.

Despues di a trata henter e caso di nobo dia 10 di november aña pasá veredicto a cay dia 30 di mei ultimo.

E acusado tabatin dos abogado y nan a dun’é chèns pa splica dicon e ta haña cu e no mester paga e suma mionario.

 

Corte Comun a tuma nota cu ta dia 10 di decèmber 2008 a condené pa: Su participacion den un organisacion criminal; violacion di ley di droga na diferente ocasion; menasa contra bida di hende diferente biaha; labamento di placa y posecion ilegal di varios arma.

 

Fiscal mr. F.A.P.M. van Deutekom a sali bisa e tribunal cu e èx condenado mester paga e placa, pasobra el a probechá financieramente di e delitonan cu el a cometé.

Segun Van Deutekom den promé instancia a calculá el a gana 6.180.000,- florin cu e negoshinan aki.

Aña pasá november Corte a reducí e suma cu e èx convicto mester na 1 mion y pico florin.

Top