Trahadornan a perde caso contra InselAir Aruba

Ayera mainta, tur wowo tabata riba Corte di Husticia pa sa con Huez lo duna su veredicto den e caso cu un grupo di trahador di InselAir Aruba a cuminsa contra di nan dunador di trabao, pa falta di cumplimento di nan obligacionnan financiero.

Huez a dicidi pa scoge pa interes general y como tal Corte a rechasa peticion di e trahadornan.

Abogado di e trahadornan tabata mr. David Kock y pa InselAir Aruba, mr. Arlene Ellis.

 

Corte a mustra si, cu e e caso di e trahadornan ta uno solido y fuerte. Pero pa interes general mester desvia y tuma parti pa InselAir awor, segun Huez den su veredicto.

Lo keda vigila e situacion di awor pa januari pa wak si e situacion ta cambia, mandando un mensahe p’e trahadornan cu si InselAir sigui kita placa y keda sin cumpli, cu Corte lo sostene e trahadornan den nan demanda y cu InselAir lo tin cu carga cu e consecuencianan.

 

Ayera mainta Huez a mustra riba e hecho cu Departamento di Impuesto no a haci ‘fastioso’ pa cobra belasting atrasa, no ta kita e responsabilidad y obligacion di InselAir Aruba pa cumpli cu su responsabilidad.

Pa loke t’e parti di pensioen, e problema di ken a acepta of no acepta pago, no ta relevante p’e relacion entre e trahadornan y InselAir.

 

De facto e responsabilidad di esaki ta cay pa InselAir over di e discrepancia aki. Tur e puntonan aki sinembargo no a nifica si cu, segun Huez, mester bay di acuerdo cu e peticion di e trahadornan, maske nan por tin tur razon. A demostra cu e compania tin problema financiero. Con nan a yega n’e problema aki, tampoco ta relevante p’e caso sumario aki.

 

Loke, segun Huez, si ta relevante ta cu tin suficiente interes p’e trahadonan pa tin pago inmediado di e sumanan menciona, compara cu e interes cu InselAir tin den e caso aki y e consecuencia pa cu esaki.

No obstante cu e caso di e trahadornan ta uno hopi solido, Huez a bisa di mester desvia y duna InselAir rason den e caso aki.

 

Y si bay di acuerdo cu demanda di e trahador di impone un boet di maximo 10 miyon florin ta solamente hinca e compania den mas problema financiero ainda. Y tur hende sa kico lo t’e consecuencia. Consecuentemente e propio trahador lo keda perhudica, si InselAir Aruba mester sera su portanan.

E consecuencia lo ta mas grandi ainda, pasobra t’e transporte aereo entre e islanan lo keda seriamente afecta.

 

Pesey interes general y bienestar general tin mas peso awor, segun Huez, pero a bisa tambe cu dependiendo e desaroyo den december y januari su decision den un caso n’e momento ey lo por ta otro.

Top